کراچی:مختلف واقعات میں 3افراد جاں بحق،مبینہ ٹارگٹ کلر گرفتار

کراچی ( صباح نیوز)کراچی کے علاقے شاہ فیصل کالونی میں پولیس نے ایک کارروائی کے دوران ٹارگٹ کلر کو گرفتار کر لیا جبکہ مختلف واقعات میں خاتون سمیت 3افراد جاں بحق اور1 شخص زخمی ہو گیا۔ تفصیلات کے مطابق کراچی کے علاقے شاہ فیصل کالونی میں پولیس نے خفیہ اطلاع پر کارروائی کرتے ہوئے سیاسی جماعت کے ٹارگٹ کلر کوگرفتار کر لیا۔پولیس کے مطابق ٹارگٹ کلر کا نام عدنان صلاح الدین ہے جس کاتعلق ایک سیاسی جماعت سے ہے، ملزم کیخلاف تھانہ شاہ فیصل کالونی میں مقدمات درج ہیں جس سے مزیدتفتیش جاری ہے۔پیر آباد کے علاقے فرنٹیئر کالونی میں ایک شخص نے اپنے سر میں گولی مار کرخود کشی کر لی۔ پولیس نے کہا کہ خودکشی کرنے والے شخص کی شناخت حنیف کے نام سے ہوئی ۔اورنگی ٹائون کے اسلام چوک کے قریب گھر میں خاتون کی پھندا لگی لاش ملی ہے، ضابطے کی کارروائی کیلئے خاتون کی لاش کو عباسی شہید ہسپتال منتقل کیا گیا ۔آئی آئی چندریگر روڈ پر تیز رفتار ڈمپر نے موٹر سائیکل کو ٹکر مار دی، جس کے نتیجے میں ایک شخص جاں بحق جبکہ ایک زخمی ہوگیا۔حادثے کے متوفی کی شناخت الیاس جبکہ زخمی شخص کی شناخت کامران کے نام سے ہوئی ۔ پولیس کے مطابق ڈمپر ڈرائیور ڈمپر موقع سے فرار ہو گیا جسے گرفتار کرنے کے لیے تلاش جاری ہے۔