بہاول پور‘خیرپور ٹامیوالی (بیورو رپورٹ‘ نامہ نگار )سابق وفاقی وزیر سید تسنیم نواز گردیزی مری میں انتقال کر گئے ان کی نماز جنازہ  آج بدھ کے روز بہاولپو ر میں ادا کی جائے گی ۔ وفاقی وزیر سید تسنیم نواز گردیزی پہلی مرتبہ قومی اسمبلی کا الیکشن خیرپور ٹامیوالی کی قومی اسمبلی کی نشست پر غیر جماعتی بنیاد پر لڑا جس میں کامیاب ہوئے اور اس وقت انہیں وفاقی وزیر تجارت کا قلمدان سونپا گیا ۔ وہ 1988میں بھی میاں ریاض پیرزادہ کے مقابلہ میں قومی اسمبلی کا الیکشن لڑے جس میں کامیابی حاصل کی اور وزیر صحت کا قلمدان دیا گیا اس کے بعد 1993ء میں خیرپور ٹامیوالی کی نشست پر ریاض پیرزادہ سے ہار گئے لیکن بعد ازاں یزمان کی قومی اسمبلی کی ضمنی انتخاب میں کامیاب ہوگئے ۔ دریں اثناء تسنیم نواز گردیزی‘ یوسف رضا گیلانی کے قریبی عزیز اور مخدوم احمد محمود کے پیپلز پارٹی جنوبی پنجاب کے صدر کے ہم زلف اور پی ٹی آئی کے ضلعی صدر سید تحسین گردیزی کے چچا ہیں۔