ڈیرہ اللہ یار(نامہ نگار)جعفرآباد کے سیلاب متاثرین کی مدد کیلئے پاک فضائیہ کے ساتھ سماجی تنظیم باغ ہیڈ پہنچ گئی۔گزشتہ روز پاک فضائیہ کی ٹیم دو ٹرکوں میں ایک ہزار بیگ راشن اور صاف پانی لیکر سیلاب سے متاثرہ علاقوں باغ ہیڈ کوئل آباد اور حبیب کوٹ پہنچی۔ ڈپٹی کمشنر جعفرآباد رزاق خان خجک کی نگرانی میں پاک فضائیہ کی ٹیم نے سیلاب متاثرین کے ایک ہزار خاندانوں میں راشن کے بیگ اور صاف پانی تقسیم کیا جبکہ دو درجن سے زائد خاندانوں کے لیے خیمے بھی شامل ہیں۔ باغ ہیڈ میں سماجی تنظیم اللہ اکبر تحریک نے سیلاب متاثرین کو روزانہ کی بنیاد پر پکا پکایا کھانا‘ مفت ادویات اور صاف پانی فراہم کرنا بھی شروع کر دیا ہے۔ سماجی تنظیم اللہ اکبر تحریک جعفرآباد کے رہنما عبید اللہ برڑو کی نگرانی میں میڈیکل ٹیم نے طبی کیمپ بھی لگا لیا جہاں پر روزانہ سیلاب متاثرین کا مفت چیک اپ اور دوائیں دی جا رہی ہیں۔