کوئٹہ (آن لائن+نوائے وقت رپورٹ) دالبندین کے علاقے راہیو میں نامعلوم افراد کی فائرنگ سے 3 دوست جاں بحق ہوگئے۔ تفصیلات کے مطابق جمعرات کے روز بلوچستان کے علاقے دالبندین راہیو میں جھاڑیوں میں چھپے نامعلوم مسلح افراد نے تینوں دوستوں کو فائرنگ کر کے قتل کر دیا، ملزمان فائرنگ کے بعد موقع سے فرار ہونے میں کامیاب ہو گئے۔ واقعہ کی اطلاع ملتے ہی پولیس کی بھاری نفری موقع پرپہنچ گئی اور علاقے کو گھیرے میں لے کر شواہد اکٹھے کئے۔ سکیورٹی فورسز نے علاقے کے تمام داخلی اور خارجی راستوں کو سیل کر کے ملزمان کا تعاقب شروع کر دیا۔ جاں بحق افراد کی شناخت امیر حمزہ، رحمت اللہ اور عین الدین کے نام سے ہوئی ہے۔ تینوں دوست گزشتہ رات پکنک منانے گئے تھے۔