لسبیلہ/کراچی/اوتھل (آئی این پی+ آن لائن) لسبیلہ میں مسافر کوچ اور ٹرک کے درمیان تصادم کے نتیجے میں 8 افراد جاں بحق اور 15 زخمی ہو گئے ، زخمیوں کو کراچی کے مختلف ہسپتالوں میں منتقل کر دیا گیا،جن میں سے کئی کی حالت تشویشناک ہے ۔ تفصیلات کے مطابق لسبیلہ کے علاقے بیلہ میں کوئٹہ سے کراچی جانے والی مسافر کوچ سامنے آنے والے ٹرک سے ٹکرا گئی۔ حادثے میں خواتین، بچوں سمیت آٹھ افراد موقع پر جاں بحق اور پندرہ زخمی ہو گئے۔پولیس اور لیویز نے موقع پر پہنچ کر زخمیوں اور جاں بحق افراد کو سول ہسپتال کراچی منتقل کیا۔ جاں بحق افراد میں سے زیادہ کا تعلق بلوچستان کے مختلف علاقوں سے ہے۔ایدھی ذرائع کے مطابق سات افراد کی نعشیں ایدھی سرد خانے منتقل کر دی گئیں۔ پولیس حکام کا کہنا ہے کہ حادثہ تیز رفتاری کے باعث پیش آیا۔ زخمیوں میں خواتین اور بچے میں شامل تھے۔واقعے کے بعد ریسکیو اہلکار جائے حادثہ پر پہنچ گئے۔ زخمیوں کو علاج کے لئے ہسپتال منتقل کیا۔علاوہ ازیں وزیراعلیٰ شہباز شریف نے لسبیلہ کے قریب ٹریفک حادثہ میں قیمتی انسانی جانوں کے ضیاع پر افسوس کا اظہارکیا ہے۔