قبائلی علاقوں کے حقوق نہ دیئے گئے تو اسلام آباد کی جانب مارچ کریں گے: سراج الحق

امیر جماعت اسلامی سراج الحق نے کہاہے کہ قبائلی عوام اپنے حقوق چاہتے ہیں، قبائلی علاقوں کے لوگ شہری حقوق چاہتے ہیں، قبائلی علاقوں میں بلدیاتی الیکشن کا انعقاد کیا جائے، پانامہ کیس میں جن کے نام شامل ہیں ان کا احتساب چاہتے ہیں، قبائلی علاقوں کے حقوق نہ دیئے گئے تو اسلام آباد کی جانب مارچ کریں گے، فاٹا کے عوام کو خیبر پی کے اسمبلی میں نمائندگی دی جائے۔ وہ قبائلی جرگے سے خطاب کر رہے تھے۔ انہوں نے کہا قبائلی علاقوں میں کوئی معیاری ہسپتال نہیں۔ خیبر ایجنسی کے لوگ خیبر پختونخوا اسمبلی میں نہیں ہیں۔ انہوں نے کہا قبائلی عوام بنیادی حقوق سے محروم ہیں۔ قبائلی عوام نے قدم بہ قدم قائداعظم کا ساتھ دیا۔ قبائل کو اب مزید ایف سی آر کی تاریکیوں میں نہیں رکھا جاسکتا۔ ملک کو جس نے بھی لوٹا اس کا احتساب ہونا چاہیے۔ جماعت اسلامی کے زیر اہتمام قبائلی جرگے کے اعلامیہ میں کہا گیا قبائلی علاقوں سے فوری ایف سی آر کا خاتمہ کیا جائے۔ فاٹا کو خیبر پی کے میں ضم کیا جائے۔ فاٹا میں 2017میں بلدیاتی انتخابات کرائے جائیں۔ 2018میں قبائلیوں کو صوبائی اسمبلی میں نشستیں دی جائیں، فاٹا میں عدالتی نظام رائج کیا جائے۔ قبائلی علاقوں میں تعلیمی ایمرجنسی لگائی جائے۔ قبائل کو این ایف سی میں 10فیصد حصہ دیا جائے۔