اسلام آباد(وقائع نگار خصوصی ) پاکستان پیپلزپارٹی کے چیئرمین بلاول بھٹو زرداری نے پیپلزپارٹی کے گولڈن جوبلی جلسے کیلئے جیالوں اور عوام کو اسلام آباد پریڈ گرائونڈ میں آنے کی دعوت دی اور کہا کہ نااہل سیاستدانوں نے ملک کو مشکلات میں مبتلا کردیا ہے ، ملک میں ہر سال 30ہزار نوجوان بیروزگار ہورہے ہیں ، ملکی دولت چند خاندانوں تک محدود ہوکر رہ گئی ہے ،5دسمبر کو پریڈ گرائونڈ میں سب کا انتظار کروں گا ۔اتوار کو چیئرمین پیپلزپارٹی بلاول بھٹو نے گولڈن جوبلی جلسے کیلئے ویڈیو پیغام جاری کیا جس میں انہوں نے جیالوں اور عوام کو اسلام آباد پریڈ گرائونڈ آنے کی دعوت دی ۔ بلاول بھٹو نے کہا کہ محبتوں ،قربانیوں ، انتھک محنت ،لازوال جذبے اور دعائوں کا شکریہ ، جیالوں اور عوام کے بناء پیپلزپارٹی کا یہ 50سال کا سفر ممکن نہیں تھا ، محترمہ شہید نے ذوالفقار بھٹو کی روایات برقرار رکھیں ۔انہوں نے کہا کہ نا اہل سیاستدانوں نے ملک کو مشکلات میں مبتلا کردیا ہے ، چیئرمین پیپلزپارٹی نے کہا کہ پریڈ گرائونڈ میں گولڈن جوبلی کا جشن منائیں گے ،تمام کارکن پریڈ گرائونڈ اسلام آباد پہنچیں۔