نیوزی لینڈ اے اورپاکستان شاہینزکے مابین پہلا چارروزہ کرکٹ میچ منسوخ

اسلام آباد ( سپورٹس رپورٹر)نیوزی لینڈ اے اورپاکستان شاہینز کے مابین پہلا چار روزہ کرکٹ میچ منسوخ کردیا گیا۔نیوزی لینڈ اے اور پاکستان شاہینز کے مابین پہلا چار روزہ کرکٹ میچ منسوخ کردیا گیا ہے۔ چار روزہ میچ پی سی بی کی درخواست پر منسوخ کیا گیا ہے۔ مینیجڈ آئسولیشن میں کھلاڑیوں کی پریکٹس میں تاخیر کی وجہ سے پی سی بی نے میچ کی تاریخوں میں تبدیلی یا منسوخی کی درخواست کی تھی۔ قومی اسکواڈ اب کوئنز ٹائون میں10سے13دسمبر تک متعدد انٹرا اسکواڈ پریکٹس میچز کھیلے گا۔پاکستان شاہینزسمیت قومی اسکواڈ میں شامل تمام ارکان 8دسمبر کو کوئنز ٹائون روانہ ہوں گے۔ کوئنز ٹائون روانگی کے لیے اسکواڈ میں شامل ہر رکن کو انفرادی طور پر نیوزی لینڈ کی وزارت صحت کی منظوری درکار ہوگی۔ تمام ارکان اس وقت کرائسٹ چرچ میں اپنی آئسولیشن کی مدت مکمل کررہے ہیں۔اسکواڈ میں شامل 8ارکان کے کوویڈ 19ٹیسٹ کی رپورٹ مثبٹ آئی۔ان 8میں سے 2ارکان کو ہسٹارک یعنی نان انفیکشیس کیسز قرار دیا گیا۔8دسمبر کوکوئنز ٹائون پہنچنے پر قومی کرکٹ ٹیم اورپاکستان شاہینز کا اسکواڈ علیحدہ علیحدہ ہوٹل میں قیام کرے گا۔ پاکستان شاہینز کا اسکواڈ 14دسمبر کو کوئنز ٹائون سے وانگرائے روانہ ہوجائے گا۔قومی اسکواڈ 15دسمبر کو کوئنزٹائون سے آکلینڈ روانہ ہوگا۔پاکستان اور نیوزی لینڈ کے مابین پہلا ٹی ٹونٹی میچ 18دسمبرکوآکلینڈ میں کھیلا جائے گا۔پاکستان شاہینز اورنیوزی لینڈ اے کے مابین واحد چار روزہ میچ 17دسمبرسے شروع ہوگا۔