لاہور(سپورٹس رپورٹر)قومی ٹی ٹونٹی ٹیم کے نائب کپتان شاداب خان نے کہا ہے کہ کافی عرصے کے بعد ہوم گراونڈ پر کھیل رہے ہیں اس لئے ویسٹ انڈیز کیخلاف ہوم گراونڈ پر کھیلنے کیلئے پرجوش ہیں۔ گزشتہ چند ماہ میں بیرون ملک ہی سیریز کھیلی ہیں اب اپنے ملک میں کھیل رہے ہیں، کراوڈ بھی ہو گا اس لئے ہم ہوم سیریز میں لطف اندوز ہوں گے۔ سننے میں آرہا ہے کہ کراوڈ کو سٹیڈیم میں آنے کی اجازت ہو گی، اپنے کراوڈ کے سامنے کھیل کر ہمیشہ خوشی ہوتی ہے، کوشش کریں گے کہ سیریز جیتیں اور کراوڈ کو مزید خوش کریں۔ 9 دن میں 6 میچز ہیں بیک ٹو بیک کھیلنے کی عادت ہے کوئی مسئلہ نہیں ہو گا اور نہ اس چیز کا پریشر ہے امید ہے اچھی سیریز ہو گی۔نائب کپتان نے ٹیم میں تبدیلیوں کے حوالے سے کہا کہ اوپر نیچے کافی سیریز ہو رہی تھیں اس لئے اب کچھ کھلاڑیوں نے آرام کیا ہے۔ ویسٹ انڈیز کیخلاف نیا کمبی نیشن آزمانے جا رہے ہیں۔ ویسٹ انڈیز کی ٹیم ٹی ٹونٹی میں اچھا کھیلتی ہے ٹیم میں تجربہ کار کھلاڑی ہیں میں سمجھتا ہوں کہ پاکستان اور ویسٹ انڈیز کے درمیان سیریز میں دلچسپ میچز ہوں گے۔