مختصر فارمیٹ کی کرکٹ میں باولر زمیچ جتوا سکتے ہیں ،اینڈریو ٹائی

کراچی (اے پی پی)ٹی ٹین تیز ترین فارمیٹ سمجھا جاتا ہے اور بہت سے کھلاڑی اسے بیٹر فیورٹ کہتے ہیں لیکن میرے خیال میں یہ فارمیٹ بیٹرز اور باولرز دونوں کا فیورٹ ہے۔ ان خیالات کا اظہار آسٹریلوی کرکٹراینڈ ریو ٹائی نے ابوظبی میں جاری ٹی ٹین ٹورنامنٹ کے دوران گذشتہ روز میڈیا سے گفتگو کرتے ہوئے کیا۔ اینڈریو ٹائی کا مزید کہنا تھا کہ ٹی ٹین فارمیٹ میں بلے بازوں کی ترجیح زیادہ سے زیادہ رنز بنانا ہوتے ہیں لیکن گیند باز کا کام بہترین گیند بازی سے بلے بازوں کی مشکلات میں اضافہ کرنا اور زیادہ سے زیادہ وکٹس کا حصول ہوتا ہے کیونکہ بہترین گیند بازی مد مقابل ٹیم کاا سکوز کم رکھنے میں معاونت کرتی ہے اور اس سے اپنی ٹیم کی پوزیشن بھی مستحکم رہتی ہے۔ ایک سوال کے جواب میں اینڈریو ٹائی کا کہنا تھا کہ ہماری اولین ترجیح یہی ہوتی ہے کہ زیادہ سے زیادہ وکٹس حاصل کی جائیں تاکہ مخالف ٹیم ہمارے زیر اثر رہے اور جیت کے لئے آسان ہدف ملے اور میں اس حکمت عملی سے اب تک کافی کامیابی حاصل کر چکا ہوں، میں جانتا ہوں کہ ایک باولر کو کم سے کم باونڈریز اور زیادہ ڈاٹ بال کروانا بہت اہم ہے۔ ابوظبی ٹی ٹین کے حوالے سے کئے گئے سوال کے جواب میں اینڈریو ٹائی نے کہا کہ یہ فارمیٹ بیٹرز اور باولرز دونوں کا فیورٹ ہے اور اس وقت تک تمام ٹیمیں بہتر کھیل کا مظاہر ہ کر رہی ہیں،ہماری کوشش ہے کہ ٹیم ابوظبی فائنل میں اپنی جگہ بنانے میں کامیاب ہو۔ واضح رہے کہ ابوظبی ٹی ٹین کا فائنل 4 دسمبر کو کھیلا جائے گا۔