جعلی ویزا، ایف آئی اے نے کراچی سے مونٹی نیگرو جاتے ہوئے مسافر گرفتار

 کراچی (این این آئی)وفاقی تحقیقاتی ادارے (ایف آئی اے)کے امیگریشن سیل کے عملے نے کراچی ایئر پورٹ سے ایک مسافر کو مونٹی نیگرو جاتے ہوئے جعلسازی پر گرفتار کرلیا ہے۔ ایف آئی اے امیگریشن کے مطابق مسافر توصیف احمد پاکستانی پاسپورٹ پر کراچی سے مونٹی نیگرو جا رہا تھا۔ حکام کے مطابق دستاویزات کی چھان بین کے دوران مسافر کے پاسپورٹ پر جاپان کا جعلی ویزا لگا ہوا تھا۔ اسسٹنٹ سب انسپکٹر ثنا اللہ کی نشاندہی پر شفٹ انچارج سب انسپکٹر زہرا چوہان نے ملزم کے خلاف کارروائی کی۔ ملزم کو ایجنٹ کی نشاندہی اور مزید قانونی کارروائی کے لیے اینٹی ہیومن ٹریفکنگ سرکل کراچی منتقل کر دیا گیا ہے۔