کبڈی کا عالمی میلہ پاکستا ن میں سجنے کو تیار‘ ٹیمیں کل آئیں گی

لاہور(سپورٹس رپورٹر) کبڈی کاعالمی میلہ 9 فروری سے پاکستان میں شروع ہوگا۔ غیرملکی ٹیموں کی آمد 6 فروری سے شروع ہوگی۔ ایونٹ کے میچز لاہور، فیصل آباد اور گجرات میں شیڈول ہیں، سیکرٹری فیڈریشن رانا سرور کے مطابق بھارت سمیت 10 ممالک نے اس ایونٹ میں شرکت کی تصدیق کررکھی ہے۔ مجوزہ پروگرام کے مطابق افتتاحی تقریب 9 فروری کو پنجاب سٹیڈیم لاہور میں ہوگی، پہلے تین دن میچز لاہور میں رکھے گئے ہیں، دو دن فیصل آباد ان میچز کی میزبانی کرے گا۔ ایک دن گجرات میں دومیچ شیڈول ہیں۔ لاہور میں ہونے والے میچز سہ پہر چار سے آٹھ بجے تک کھیلے جائیں گے۔ فیصل آباد میں بھی یہ ہی اوقات مقرر کیے گئے ہیں، صرف گجرات کے میچز دن میں ہوں گے۔ سیمی فائنل اور فائنل لاہورمیں ہوں گے۔ سولہ فروری کو فاتح ٹیم کو ایک کروڑ روپے انعام رقم دی جائیگی، رنر اپ کو پحھہتر لاکھ روپے ملیں گے۔