بے گناہ کشمیریوں کو ماورائے عدالت قتل کیا جارہا ہے. پاکستان

پاکستان نے مقبوضہ کشمیرمیں کشمیری عوام پرڈھائے جانے بھارتی مظالم کی مذمت کرتے ہوئے کہا ہے کہ  نہتے اور بے گناہ کشمیریوں کو ماورائے عدالت قتل کیاجارہا ہے، مقبوضہ کشمیر میں گزشتہ ہفتے قابض افواج نے جعلی مقابلوں میں 3 کشمیریوں کو شہید کیا۔یوم یکجہتی کشمیر کے موقع پر اپنے بیان میں ترجمان دفتر خارجہ زاہد حفیظ نے کہا کہ بھارتی افواج نے جعلی سرچ آپریشن کرکے نصف درجن نوجوانوں کو گرفتار کیا گیا۔ بیگناہ کشمیریوں کا قتل بھارتی ریاستی دہشتگردی کا واضح ثبوت ہے اور کشمیری قیادت جھوٹے الزامات کے تحت غیرانسانی حالات میں بھارتی جیلوں میں قید ہے۔زاہد حفیظ نے کہا کہ بھارت مقبوضہ کشمیر کے آبادیاتی ڈھانچے کو تبدیل کرنے کی کوششیں جاری رکھے ہوئے ہے، بھارتی وزارت داخلہ کے مطابق 25 جنوری تک 33 لاکھ سے زائد جعلی ڈومیسائل جاری کیے گئے، عالمی برادری کو مقبوضہ کشمیر کی سنگین صورتحال کا فوری نوٹس لینا چاہیے۔انہوں نے کہا کہ ہر سال 5 فروری کو یومِ یکجہتی کشمیر منایا جاتا ہے، ملک بھر میں ایک منٹ کی خاموشی اختیار کی جائے گی۔ یکجہتی واک اسلام آباد اور ملک بھر میں ہوں گی۔ دنیا بھرمیں پاکستانی سفارتخانوں میں سیمینار اور تقریبات منعقد کی جائیں گی.