کراچی(آئی این پی) کراچی کنگز کے سابق کپتان آل رائونڈر عماد وسیم  نے کہاہے کہ کراچی کنگز کی ٹیم 3میچز ضرور ہاری ہے مگر ٹورنامنٹ ختم نہیں ہوا، ٹیم پاکستان سپر لیگ سیون میں ضرور کم بیک کریگی۔ اپنے ایک  انٹرویو میں 33سالہ آل رائونڈر نے کہا کہ پی ایس ایل ٹورنامنٹ پاکستان کا نمبر ون برانڈ بن چکا ہے اور پوری دنیا میں اس کے مداح موجود ہیں، اس میں کھیلنا ہمارے لیے فخر کی بات ہے۔ ابھی 7میچز باقی ہیں، ضروری ہے کہ سب ایک دوسرے کو بیک کریں اور اگلے میچز میں اپنا بہتر سے بہتر دینے کی کوشش کریں۔ایک سوال پر کراچی کنگز کے سابق کپتان نے کہا کہ ایک اچھی کارکردگی ٹیم میں اسپارک ڈال سکتی ہے۔ پچھلے سال دیکھا کہ یہاں ملتان ہار رہا تھا لیکن دوسرے مرحلے میں جیتنا شروع کردیا اور پھر چیمپئن بن گیا ،ہمارے ساتھ ا لٹا ہوگیا تھا، تین ناکامیوں کو اگر ذہن پر سوار کرلیا تو آنے والے میچز میں اور غلطیاں کردیں گے، اگلے میچز میں رزلٹ جیسا بھی ہو، ہم گرانڈ میں بھرپور لڑیں گے۔