کارکن تحمل کا مظاہرہ کریں، لندن بھاگ جانے والوں کیلئے نہ لڑیں: سعد رضوی 

لاہور؍ کوٹ رادھا کشن (خصوصی نامہ نگار+ نمائندہ نوائے وقت) تحریک لبیک  کے  بادامی باغ داتا نگر، جلوموڑ، ایل ڈی چوک اور مانگا منڈی میں بڑے پاور شو ہوئے۔ بادامی باغ داتا نگر میں جلسہ  سے خطاب کرتے ہوئے امیر تحریک لبیک  حافظ سعد حسین رضوی  نے کہا  کہ  الیکشن گزر جانا ہے سب نے یہیں رہنا ہے، الیکشن میں مردانگی اختیار کریں، آپ ہمارے بھائی ہیں بھٹکے ہوئے ہیں یہ نہ کریں ایک دن لوٹ کر ادھر ہی آنا ہے، اگر تم ہمارے گلوں کو آؤ گے تو ہم تمہارے سر کچل دیں گے۔ کس کیلئے گولیاں مار رہے ہو جو پچاس روپے کے اشٹام پر بھاگ گیا تھا۔ انہوں نے کہا کہ اگر ہم نے کوئی چیز اٹھائی تو شہر جل جائے گا۔ وہ کوئی اور ہیں جو پولیس کا ڈالہ دیکھ کر ڈر جاتے ہیں۔ تحمل اور بردباری کا مظاہرہ کریں تمام پارٹیوں کے کارکنان کو کہتا ہوں میں بھی کارکن ہوں، ان کیلئے نہ لڑو جنہوں نے مشکل وقت میں لندن بھاگ جانا ہے۔ دریں اثناء وزیر آباد کے حلقہ این اے 66، پی پی 35 کے امیدواروں کی انتخابی مہم سے بھی خطاب کیا۔ بعد ازاں پی پی 175 چودھری محمد علی کی انتخابی ریلی سے خطاب کرتے ہوئے انہوں نے کہا کہ نہ نواز نہ شہباز نہ زرداری نہ بلاول اور نا ہی سعد کے کہنے پر ووٹ ڈالیں، جب ووٹ کی پرچی ہاتھ میں اٹھائیں تو سوچیں کہ کون بندہ ٹھیک ہے۔