لاہور (خصوصی رپورٹر) گورنمنٹ کالج یونیورسٹی میں ہونہار طلبا و طالبات کو لیپ ٹاپ تقسیم کرنے کی تقریب سے خطاب کرتے ہوئے طالب علم سعدالحسن نے وزیراعلیٰ شہباز شریف کو تعلیمی شعبے کی بہتری کیلئے انقلابی اقدامات پر زبردست خراج تحسین پیش کیا۔ طالب علم نے اظہار خیال کرتے ہوئے کہا کہ اسلام آباد کے حکمرانوں کی کرپشن اور مہنگائی نے ہمیں بڑے دکھ دیئے ہیں۔ وزیراعلیٰ شہباز شریف درد دل سے عوام کی خدمت کر رہے ہیں۔ گورنمنٹ کالج یونیورسٹی کے وائس چانسلر ڈاکٹر خلیق الرحمن نے تقریب سے خطاب کرتے ہوئے کہا کہ عجیب اتفاق ہے کہ گورنمنٹ کالج یونیورسٹی اپنے قیام کے 150 ویں سال میں داخل ہو رہی ہے اور آج منعقدہ تقریب میں شہباز شریف سمیت اولڈ راوین موجود ہیں۔ انہوں نے تعلیمی شعبے کی بہتری کیلئے انقلابی اقدامات کرنے پر شہباز شریف کو خراج تحسین پیش کرتے ہوئے گورنمنٹ کالج یونیورسٹی میں شہباز شریف ڈبیٹنگ گولڈ میڈل کے اجراءکا اعلان کیا۔