سڈنی (اے پی پی) آسٹریلیا سری لنکا کے کھلاڑیوں اور مداحوں نے تیسرا ٹیسٹ شروع ہونے سے قبل سابق انگلش ٹیم کے کپتان اور مشہور کمنٹیٹر ٹونی گریگ کو زبردست خراج عقیدت پیش کیا۔ ٹونی گریگ جو کہ پھیپھڑوں کے کینسر میں مبتلا تھے لیکن دل کا دورہ پڑنے کے باعث گزشتہ ہفتے انتقال کر گئے تھے۔ گزشتہ روز سڈنی میں سری لنکا اور آسٹریلیا کی ٹیموں کے درمیان شروع ہونے والے تیسرے اور آخری کرکٹ ٹیسٹ میچ میں دونوں ٹیموں کے کھلاڑیوں اور مداحوں نے ٹونی گریگ کی یاد میں ایک منٹ کی خاموشی اختیار کر کے انہیں خراج عقیدت پیش کیا۔ گریگ کا شمار اپنے دور کے منجھے ہوئے بلے بازوں میں کیا جاتا تھا اس کے بعد وہ مشہور کمنٹیٹر کے طور پر جانے جاتے تھے۔