لاہور (سپورٹس رپورٹر )دوسرے اور آخری ٹیسٹ کی پہلی اننگز میں اظہر علی نروس نائنٹیز کا شکار ہو گئے جبکہ پاکستانی ٹیم 297 رنز پر آؤٹ ہو گئی۔کرائسٹ چرچ ہیگلے اوول میں کھیلے جا رہے ٹیسٹ کے پہلے روز نیوزی لینڈ نے ٹاس جیت کر پاکستان کو پہلے بیٹنگ کی دعوت دی۔قومی ٹیم کے ابتدائی بلے باز ایک بار  پھر دھوکہ دے گئے، شان مسعود اور عابد علی کی جوڑی پھر ناکام رہی، حارث سہیل اور فوادعالم بھی کھانے کے وقفے سے پہلے پویلین لوٹ گئے۔شان مسعود تو صفر پر ہی پویلین لوٹ گئے، دوسری وکٹ پر عابد علی اور اظہر علی نے 62رنز کی شراکت قائم کی، عابد علی بھی 25 رنز بنا کر واپس گئے، حارث سہیل ایک اور پہلے ٹیسٹ کے سنچری میکر فواد عالم صرف دو رنز بنا سکے۔دوسری جانب تجربہ کار اظہر علی نے ذمے دارانہ بیٹنگ جاری رکھی اور کیریئر کی 32 نصف سنچری بنانے میں کامیاب رہے، کھانے کے وقفے پر پاکستان کا سکور چار وکٹ پر 88 رنز تھا۔کھانے کے وقفے کے دوران بارش کے سبب کھیل تاخیر سے شروع ہوا لیکن کچھ دیر بعد روک دیا گیا جو 40 منٹ رْکا رہا، دوبارہ میچ شروع ہونے پر اظہر علی اور محمد رضوان نے اننگز آگے بڑھائی، پانچویں وکٹ پر دونوں کے درمیان 50 رنز کی قشراکت بھی مکمل ہوئی جبکہ کپتان محمد رضوان نے بھی نصف سنچری سکور کی، وہ 61 رنز بنا کر آؤٹ ہوئے۔اظہر علی نروس نائنٹیز کا شکار ہو کر 93 رنز بنا کر آؤٹ ہوئے جبکہ فہیم اشرف نے 48 اور ظفر گوہر نے 34 رنز سکور کیے۔شاہین شاہ آفریدی چار ‘نسیم شاہ بارہ رنز بناکر آئوٹ ہوئے ۔محمد عباس بغیر کوئی رن بنائے ناٹ آئوٹ رہے۔نیوزی لینڈ کی جانب سے کائل جیمیسن 5 کھلاڑیوں کو آؤٹ کیا جبکہ دو دو وکٹیں ٹم ساؤتھی اور ٹرینٹ بولٹ کے حصے میں آئیں، میٹ ہنری نے بھی ایک کھلاڑی کو آؤٹ کیا۔خیال رہے کہ دو ٹیسٹ میچوں کی سیریز میں نیوزی لینڈ کو ایک صفر کی برتری حاصل ہے ۔