نارنگ منڈی: سری رام پورہ سٹیشن کے قریب دھماکہ‘ مال گاڑی پٹڑی سے اتر گئی

نارنگ منڈی (نمائندہ نوائے وقت) لاہور نارووال سیکشن پر مال گاڑی پٹری سے اتر گئی۔ ٹرینوں کی آمدورفت معطل ہوگئی۔ مسافر شدید پریشانی میں مبتلا رہے۔ کئی گھنٹے بعد ٹریک کو کھول دیا گیا۔ تفصیل کے مطابق لاہور سے نارووال جانے والی پاکستان ریلوے کی مال بردار گاڑی سری رام پورہ سٹیشن کے قریب زوردار دھماکے سے پٹری سے اتر گئی۔ انجن زمین میں دھنس گیا اور کئی بوگیاں بھی پٹری سے اتر گئیں۔ انجن اور ٹریک کو کافی نقصان پہنچا جس سے لاہور سے نارنگ نارووال سیالکوٹ سیکشن پر ٹرینوں کی آمدورفت معطل ہوگئی اور ٹریک کی بحالی کا عمل شروع کردیا گیا۔ ٹرینوں کی آمدورفت معطل ہونے سے لاثانی ایکسپریس، علامہ اقبال ایکسپریس، فیض احمد فیض اپنے وقت کے مطابق روانہ نہ ہوسکیں جس سے مسافروں کو شدید پریشانی کا سامنا کرنا پڑا اور اپنی منزل مقصود کے لئے دیگر ٹرانسپورٹ کا استعمال کیا گیا۔