اینٹیگا (سپورٹس ڈیسک)بھارتی بلے باز کالی آندھی کے سامنے ڈھیر ہوگئے۔ چوتھے ون ڈے میں ویسٹ انڈیز کے189رنز کے جواب میں بھارتی سورما صرف 178رن بناکر چلتے بنے۔ویسٹ انڈیز نے چوتھے ون ڈے انٹرنیشنل میں بھارت کو 11 رنز سے شکست دے دی۔ بھارتی ٹیم 190 رنز کا ہدف حاصل کرنے میں ناکام رہی۔ جیسن ہولڈر کو 5 وکٹیں حاصل کرنے پرمیچ کا بہترین پلیئر قرار دیا گیا۔ اینٹیگا میں کھیلے گئے میچ میں ویسٹ انڈیز نے پہلے بیٹنگ کرتے ہوئے مقررہ 50 اوورز میں 9 وکٹوں کے نقصان پر 189 رنز بنائے۔ ایون لوئس اور کائل ہوپ 35 ، 35 جبکہ شے ہوپ 25 اور روسٹن چیز 24 رنز کے ساتھ نمایاں رہے۔ امیش یادیو اور ہارڈیک پانڈیا نے تین، تین وکٹیں حاصل کیں۔ بھارت کی ٹیم مطلوبہ ہدف حاصل کرنے میں ناکام رہی اور پوری ٹیم 49.4 اوورز میں 178 رنز بناکر آئوٹ ہوگئی۔ اجنکیا راہانے 60 اور ایم ایس دھونی نے 54 رنز بنائے۔ جیسن ہولڈر نے تباہ کن بائولنگ کی اور 27 رنز کے عوض 5 کھلاڑیوں کو آئوٹ کیا۔ انہیں میچ کا بہترین پلیئر قرار دیا گیا۔سیریز کا آخری ون ڈے جمعرات کو کنگسٹن میں کھیلا جائے گا۔