حکومتی نا اہلی سے لوڈشیڈنگ کا عفریت پھر لوٹ آیا: شہباز شریف

لاہور (خصوصی رپورٹر) شہبازشریف   نے کہاہے کہ نوازشریف کی قیادت میں  مسلم لیگ (ن) نے لوڈ شیڈنگ کے خاتمے کی پانچ سال مسلسل محنت کی تھی، لوڈ شیڈنگ کا عفریت پانچ سال بعد پھر پاکستان میں لوٹ آیا ہے جس کے باعث پاکستان کے عوام کو شدید مشکلات اور مصائب کا سامنا کرنا پڑ رہا ہے، پی ٹی آئی حکومت کی 3 سال کی بدانتظامی اور کرپشن سے ملک میں بجلی اور گیس کی لوڈشیڈنگ پھر شروع ہوگئی ہے جو   حکومت کی بدترین کارکردگی اور نااہلی کا منہ بولتا ثبوت ہے، بجلی کی ترسیل اور لائنوں کی تنصیب کے بارے میں بھی پی ٹی آئی نے غلط بیانی کی، پی ٹی آئی کی کرپشن اور نااہلی کی وجہ سے پاکستان ہر ماہ216  ملین ڈالر ادا کررہا ہے ،کرونا بحران کے دوران تاریخ کی سستی ترین ایل این جی مل رہی تھی، پی ٹی آئی حکومت نے یہ موقع ضائع کردیا، اسی ایل این جی کو آج پی ٹی آئی حکومت تین گنا زیادہ قیمت ادا کرکے خرید رہی ہے ۔  پی ٹی آئی نے مسلم لیگ  (ن) کے خلاف جھوٹ بولا کہ بہت زیادہ پاور پلانٹس لگائے گئے ۔ اتنی شدید لوڈشیڈنگ سے پی ٹی آئی کے یہ دعوے جھوٹ ثابت ہوگئے ہیں۔ پی ٹی آئی خود سورج، ہوا اور گیس سے چلنے والے پلانٹس کی تنصیب کے دعوے کررہی ہے لہذا ضرورت سے زائد بجلی بنانے کے الزامات جھوٹ ثابت ہوجاتے ہیں، پی ٹی آئی کے مسلم لیگ (ن)پر مہنگے پلانٹ لگانے کے دعوے بھی جھوٹے اور بے بنیاد ثابت ہوئے، تین سال اس جھوٹ کی بنیاد پر  مسلم لیگ (ن) کا میڈیا ٹرائل کیاگیا۔ اپوزیشن قائدین کو نیب اور ایف آئی اے کے ذریعے سیاسی انتقام کا نشانہ بنایاگیا، پی ٹی آئی کسی ایک پاور پلانٹ کے بارے میں یہ ثابت نہیں کرسکی کہ وہ مہنگا لگا ہے۔ ہم نے ایل این جی سے چلنے والے تین پاور پلانٹس میں200  ارب روپے سے زائد کی بچت کی، دنیا بھر میں اس سے سستے اور بہترین بجلی بنانے والے پلانٹس کی تنصیب کی کوئی اور مثال ہے تو بتائیں۔2019  میں2300 میگاواٹ اور2020  میں اسی نظام سے 25000 میگاواٹ بجلی کی ترسیل ہوئی، یہ  مسلم لیگ (ن)کے دور میں بجلی کی پیداوار اور ترسیل کے نظام کی صلاحیت بڑھنے کا ثبوت ہے ۔آج قوم کے کام آنے والے ایل پی جی ٹرمینلز پاکستان مسلم لیگ(ن) کے دور میں لگائے گئے تھے ۔ پی ٹی آئی حکومت نے اب تک صرف ایک ایل این جی کارگو طویل المدتی کنٹریکٹ پر خریدا ہے  فرنس اور ڈیزل پر مہنگی بجلی بنا کر عوام پر ظلم کیاگیا ،کرونا جو گیس کارگو4  ڈالر پر مل رہا تھا، پی ٹی آئی 12 ڈالر فی ایم ایم بی ٹی یو پر خرید رہی ہے، پی ٹی آئی کی اس مجرمانہ نااہلی کی وجہ سے 12 ملین ڈالر اضافی پاکستان کو خرچ کرنے پڑ رہے ہیں پی ٹی آئی حکومت فرنس آئل کی امپورٹ پر 30  ہزار فی ٹن زیادہ ادا کررہی ہے ، مسلم لیگ(ن) نے کوئلے سے سستی بجلی پیدا کرنے کے پلانٹ بھی لگائے، پاکستان میں کوئی اور پاور پلانٹ اتنی سستی بجلی پیدا نہیں کرتے جتنے کوئلے کے پلانٹس بناتے ہیں، بجلی اور پٹرولیم کے تمام نظام اور اس کی ترتیب کو پی ٹی آئی حکومت نے اپنی بدانتظامی اور کرپشن کی بھینٹ چڑھا دیا ہے۔