کراچی (اسٹاف رپورٹر) پاکستان پیپلزپارٹی کے نامزدامیدواریوسی 8سرجانی ٹائون قادربخش بروہی نے کہاہے کہ عوامی خدمت ہی پیپلزپارٹی کا منشور ہے، پیپلزپارٹی کے جیالے گھر گھر جاکر پیپلزپارٹی کا منشور عوام تک پہنچائیں۔عوام جانتی ہے کہ سرجانی ٹائون کے دیرینہ مسائل بھی پیپلزپارٹی نے حل کئے ہیں اور آئندہ بھی پیپلزپارٹی ہی حل کرے گی، باقی پارٹیاںصرف باتیں کرتی اور جھنڈے لگاتی ہیںجبکہ اپنی خدمات کی وجہ سے پیپلزپارٹی عوام کے دلوں میں بستی ہے۔انہوں نے کہاکہ بلدیاتی الیکشن میں پیپلزپارٹی پورے کراچی سے کامیاب ہوگی اور کراچی کا مئیر پیپلزپارٹی کا جیالا ہوگا۔ انہوںنے سندھ حکومت کی جانب سے جاری پورے کراچی میں ترقیاتی کاموں پر مبارک باد بھی پیش کرتے ہوئے کراچی کے شہریوں کے لئے پیپلزبس سروس کے افتتاح کو عوام کے لئے بیش بہاتحفہ قراردیا۔قادربخش بروہی نے کہاہے کہ24جولائی کو عوام تیرکے نشان کو ووٹ دیںگے،تیر کی کامیابی عوام کی کامیابی ہے،ان شاء اللہ منتخب ہوکر یونین کونسل 8کو ماڈل یوسی بنادیں گے۔یہ باتیں انہوں نے حلقہ یوسی 8سرجانی کے دورے کے موقع پرعلاقہ مکینوں سے بات چیت کرتے ہوئے کہیں۔اس موقع پرانہوں نے دیگر امیدواروں کا تعارف کرواتے ہوئے بتایاکہ اس حلقے سے پاکستان پیپلزپارٹی کے نامزدکردہ امیدوارعلاقے کی جانی مانی شخصیات ہیںاور عوام کے درمیان رہتے ہیں یہی وجہ ہے کہ عوام کے دکھ سکھ سے واقف ہیں،پی پی پی امیدوار منتخب ہوکر عوام کی مزید خدمت کریں گے۔انہوں نے کاموں کی تفصیل پر روشنی ڈالتے  ہوئے بتایاکہ مختلف سیکٹرزمیں اسٹریٹ لائٹس کی تنصیب،پانی کی لائنیں، نادراوین کے ذریعے شناختی کارڈکی سہولیات،علاقوںمیں روشنی کے انتظامات، کچرااٹھانے اور ٹھکانے کے لئے خصوصی توجہ، نوجوانوں کو اسپورٹس کی سرگرمیوں کے لئے بھرپور کوششیں کی جائیں گی۔