لاہور(سپورٹس رپورٹر)سپورٹس بورڈ پنجاب کے تعاون سے ایشین رگبی چیمپئن شپ ڈویژن ون کے 2 میچز کی سیریز کا پہلا اہم میچ آج پنجاب سٹیڈیم میں ہو گا۔پنجاب ڈاکٹر آصف طفیل اور ایڈیشنل سیکرٹری سپورٹس میڈم نبیلہ نے پنجاب سٹیڈیم میں انتظاما ت کے حوالے سے جائزہ لیا۔ ڈی جی سپورٹس پنجاب ڈاکٹر آصف طفیل نے اس موقع پر کہا ہے کہ یو اے ای کی مہمان ٹیم کو لاہور میں خوش آمدید کہتے ہیں۔ ایشین رگبی چیمپئن شپ ڈویژن ون کے 2 میچز کا پاکستان میں انعقاد خوش آئند ہے۔ سنگاپور، ہانگ کانگ، ملائیشیا سے آنے والے تمام میچ آفیشلز اور یو اے ای ٹیم کیلئے بہترین انتظاما ت کیے گئے ہیں۔ آج پہلا میچ اور پھر 8جولائی کو دوسرا میچ پنجاب سٹیڈیم میں ہو گا۔ ایشین رگبی چیمپئن شپ کے انٹرنیشنل میچز کے پاکستان میں انعقاد سے ہمارے رگبی کے کھلاڑیوں کو نہ صرف سیکھنے کا موقع ملے گابلکہ رگبی کا نیا ٹیلنٹ بھی سامنے آے گا۔ ایشین رگبی چیمپئن شپ ڈویژن ون کے میچز کے موقع پر ایشین رگبی یونین کے انٹرنیشنل نمائندے بھی موجود ہوں گے۔