لاہور(سپورٹس رپورٹر)پاکستان ویسٹ انڈیز ون ڈے کرکٹ سیریز کیلئے ملتان کرکٹ سٹیڈیم کی سج دھج کا آغاز کردیاگیاہے۔ملتان ویسٹ مینجمنٹ کمپنی نے سٹیڈیم اورروٹ کی صفائی کے انتظامات سنبھالتے ہوئے پویلین کی صفائی،دھلائی اور نشستوں کو چمکانے کا کام شروع کردیاہے۔اس سلسلے میں سی ای او ملتان ویسٹ مینجمنٹ کمپنی محمدفاروق ڈوگر نے بتایاکہ پاکستان ویسٹ انڈیزون ڈے سیریزایک بین الاقوامی ایونٹ ہے۔جس میں شرکت کیلئے بیرون ملک سے کرکٹ مبصراورمیڈیا آئیگا۔غیرملکی مہمانوں کی آمد کے پیش نظر ملتان شہر کو دلہن کی طرح سجایا جائے گا اور اس مقصد کیلئے ایک ایک سو ورکرز پر مشتمل دو صفائی سکواڈ تشکیل دے دیئے ہیں۔ ایک صفائی سکواڈ کرکٹ سٹیڈیم کے اندر صفائی کیلئے خدمات سرانجام دے گاجبکہ دوسرا صفائی سکواڈ ہوٹلز سے سٹیڈیم تک روٹ کو چمکائے گا۔پوریروٹ کی واشنگ اورلائم لائننگ ہوگی۔سٹیڈیم اورروٹ کیلئے دوالگ الگ فوکل پرسنزبھی مقررکردئے ہیں۔ سیریز کے دوران غیرملکی مہمانوں اورشائقین کرکٹ کو خوشگوارماحول فراہم کیا جائیگا۔