کراچی (نوائے وقت رپورٹ) کراچی کے سپر سٹور میں آگ شارٹ سرکٹ کے باعث لگی اور سٹاک کئے گئے کوکنگ آئل کی وجہ سے پھیلی۔ کراچی میں میڈیا سے گفتگو کرتے ہوئے اسسٹنٹ کمشنر فیروز آباد عاصمہ بتول نے کہا کہ آگ شارٹ سرکٹ کے باعث لگی اور آگ کی پہلی اطلاع 10 بج کر 40 منٹ پر ملی۔ انہوں نے بتایا  کہ کوکنگ آئل مہنگا ہونے پر بیسمنٹ میں ذخیرہ کیا گیا تھا اس لیے  آگ کوکنگ آئل کی وجہ سے زیادہ پھیلی ہے، آگ اب بھی مختلف حصوں میں لگی ہوئی ہے تاہم شدت کم ہے۔ اسسٹنٹ کمشنر نے مزید  بتایا کہ عمارت کے پارکنگ ایریا تک آگ پہنچ گئی ہے جہاں گاڑیاں اور موٹرسائیکلیں موجود ہیں جبکہ عمارت میں موجود تین موٹرسائیکلیں جل چکی ہیں، کوشش کر رہے ہیں گاڑیاں باہر نکال لی جائیں۔