لاہور( نامہ نگار)پیپلزپارٹی پنجاب کے صدر قمر زمان کائرہ نے کہا ہے کہ پیپلز پارٹی کے کارکنوں کی فتح ہے۔آصف علی زرداری نے جو کہا کر کے دکھایا۔پی ڈی ایم کی ساری قیادت اس جیت پر مبارکباد کی مستحق ہے۔پیپلزپارٹی پنجاب کے جنرل سیکرٹری چودھری منظور احمد نے کہا ہے کہ ثابت ہوگیا کٹھ پتلی حکمران صرف بیساکھیوں ہر کھڑے ہیں۔اس شکست فاش پر عمران خان کو فوری طور پر مستعفی ہوجانا چاہیے۔ قومی اسمبلی میں بندوبستی نظام کو شکست اور جمہوریت کو فتح ملی ہے۔سابق گورنر پنجاب و پاکستان پیپلز پارٹی جنوبی پنجاب کے صدرمخدوم سید احمد محمود نے کہا ہے کہ سینیٹ الیکشن میں جنرل نشست پر یوسف رضا گیلانی کی کامیابی جمہوریت کی کامیابی ہے۔ حکومتی سلیکٹڈ امیدوار کے مقابلے میں پی ڈی ایم کے امیدوار یوسف رضا گیلانی کی کامیابی اپوزیشن عوام دوست ایجنڈے کی کامیابی ہے۔ وقت قریب آن پہنچا ہے کہ ملک و قوم پر ظلم و جبر کے پہاڑ مسلط کرنے والے عوام کٹہرے میں ہوںگے۔ پیپلز پارٹی کے مرکزی ڈپٹی سیکرٹری اطلاعات چوہدری منورانجم نے کہا ہے کہ یوسف رضا گیلانی کی جیت جمہوریت کی جیت ہے ۔اب عوام پر مسلط غاصب حکمران بے نقاب ہوچکے ہیں۔عمران خان کو اخلاقی طور پرفوری مستعفی ہوجانا چاہیے۔