ڈاکو جانور ٹرک میں لوڈ کرکے فرار،تعاقب پر فائرنگ،شہری جاں بحق

جہانیاں،سرا ئے سدھو،بورے والا ،شاہ جمال  ،کوٹ ادو(نامہ نگار،نمائندہ نوائے وقت،تحصیل رپورٹر،خبرنگار)ڈاکو جانور ٹرک میں لوڈ کرکے فرار ،تعاقب پر فائرنگ،شہری جاں بحق ہوگیا۔ جہانیاں سے نامہ نگار،نمائندہ نوائے وقت کے مطابق چک 126دس آر کے رہائشی ارباب جہانگیر نے پولیس کو اطلاع دی کہ آٹھ سے زائد مسلح افراد ڈیرے پر گھس آئے اور ظفر اور شاہد کو رسیوں سے باندھ کر کمرے میں محبوس کر دیا اور ڈیرے پر ایک بھینس،3گائیں،5بچھڑے اور4بکریاں ٹرک میں لوڈ کرکے فرار ہو گئے۔ موٹر سائیکل سوار دو مسلح ڈاکوؤں نے چک تین ایم آر میں کریانہ شاپ مالک بشیر احمد سے نقدی چھین لی اور فرار ہو گئے، شو ر ووایلہ پر ڈاکوؤں کا تعاقب شروع کر دیا چک 175دس آر کے نزدیک ڈاکوؤں نے فا ئرنگ کر دی،گولی لگنے سے چک تین ایم آر کا رہائشی غضنفر عباس شدید زخمی ہو گیا جسے ڈسٹرکٹ ہسپتال خانیوال لے جایا گیا لیکن وہ جانبر نہ ہو سکا اور دم توڑ گیا۔سرا ئے سدھو سے نامہ نگار کے مطابق دو نامعلوم خواتین ایک بچے کے ہمراہ  جیولر  سے سات تولہ طلائی زیورات سمٹ کر غائب ہوگئیں۔میلسی  سے تحصیل رپورٹر کے مطابق سلیم شبیر کی کریانہ کی دکان پردو ڈاکو موٹر سائیکل پر سوار ہوکر آئے اور اس سے اسلحہ کے زور پر20ہزار نقدی اورموبائل فون چھین کر فرار ہوگئے۔بورے والا سے تحصیل رپورٹر کے مطابق تھانہ سٹی کی حدود لاہور روڈ پر موجود وسیم اپنے موبائل فون پر کال سن رہا تھا کہ اسی دوران نامعلوم موٹر سائیکل سوار موبائل فون چھین کرفرار ہو گیا ۔ شاہ جمال سے نامہ نگار کے مطابق نامعلوم ڈاکوؤں نے غریب ٹریکٹر ٹرالی ڈرائیور سے اسلحہ کے زور پر ہزاروں کی نقدی چھین لی دوران واردات بد ترین تشدد کا نشانہ بنایا ۔کوٹ ادو سے خبر نگارکے مطابق موضع ہنجرائی مستقل غربی کے اشفاق احمدکا موٹر سائیکل  چوری، حافظ محمد رمضان نے 15پر کال کی کہ اس کے منشی محمد شعیب نے اس سے 90 ہزارچھین لیے ہیں کال جھوٹی ثابت ہونے پر پولیس نے محمد رمضان کو حراست میں لے کر مقدمہ درج کرلیا ۔
وارداتیں