پی ایس ایل:عثمان کی سنچری ‘کراچی کو شکست، ملتان سلطانز پلے آف مرحلہ میں پہنچ گئی

 لاہور(سپورٹس رپورٹر)پاکستان سپر لیگ سیزن 9 میں ملتان سلطانز نے کراچی کنگز  کو 20 رنز سے شکست دے کر پلے آف کیلئے کوالیفائی کرلیا۔کراچی کے نیشنل بینک سٹیڈیم میں کھیلے گئے میچ میں ملتان سلطانز کے کپتان محمد رضوان نے ٹاس جیتا اور پہلے بیٹنگ کرنے کا انتخاب کیا۔ملتان سلطانز اور کراچی کنگز دونوں نے اپنی ٹیم میں دو، دو تبدیلیاں کیں۔کنگز میں کیرون پولارڈ اور انور علی کی جگہ لوئس ڈپلائے اور میر حمزا شامل ہوئے۔سلطانز نے آفتاب ابراہیم اور شاہ نواز دھانی کی جگہ کرس جارڈن اور ڈیوڈ ویلے کو ٹیم میں شامل کیا۔ملتان سلطانز نے 3 وکٹوں پر 189 رنز بنائے، عثمان خان نے 59 گیندوں پر 106 رنز کی ناقابل شکست اننگز کھیلی۔ یہ ان کی پی ایس ایل میں دوسری سنچری ہے۔کپتان محمد رضوان 58 ‘ ریزا ہینڈرکس 13 ، افتخار احمد 4 رنز بناکر آؤٹ ہوئے۔ مزارابانی نے 2 اور حسن علی نے ایک وکٹ حاصل کی۔ 190 رنز کے تعاقب میں کراچی کنگز کی ٹیم 7 وکٹوںپر 169 رنز بناسکی۔شعیب ملک 38 اور شان مسعود 36 رنز بناکر نمایاں رہے، عرفان خان 23 ، حسن علی 17 اور لیوس ڈوپلوئے 12 رنز بناکر آؤٹ ہوئے جبکہ جیمز وینس 7 اور ٹم سیفرٹ ایک رن بنا سکے۔ محمد نواز 27 رنز کیساتھ ناٹ آؤٹ رہے۔اسامہ میر نے 2 کھلاڑیوں کو آؤٹ کیا، ڈیوڈ ولی، محمد علی ، کرس جارڈن اور خوشدل شاہ نے ایک ایک وکٹ حاصل کی۔عثمان خان کو میچ کا بہترین کھلاڑی قرار دیا گیا ۔ پوائنٹس ٹیبل پر ملتان سلطانز 7 میچز میں 12 پوائنٹس  کیساتھ ٹاپ پوزیشن پر ہے اور وہ پلے آف مرحلہ میں پہنچنے والی پہلی ٹیم بھی بن گئی ہے۔ کراچی کو 6 میں سے صرف 2 میچز میں کامیابی ملی ہے اور 4 میں شکست ہوئی ہے۔پوائنٹس ٹیبل پر ملتان سلطانز کا پہلا، کوئٹہ گلیڈی ایٹرز کا دوسرا اور پشاور زلمی کا تیسرا نمبر ہے۔اسلام آباد کی چوتھی ،کراچی کی پانچویں اور لاہور قلندرز کی چھی پوزیشن ہے۔