ایف سی کالج میں سالانہ تقریب ، 1000سابق طلبا ء کی شرکت

لاہور(لیڈی رپورٹر) فورمین کرسچن کالج (اے چارٹرڈ یونیورسٹی) نے سالانہ تقریب کے دوران مختلف شعبوں سے تعلق رکھنے والے ایک ہزار سے زائد ممتاز سابق طلباء اور معزز مہمانوں کو اکٹھا کیا۔ اس تقریب میں سیاست دانوں، سرکاری ملازمین، بیوروکریٹس، سفارت کاروں، اساتذہ، اسکالرز، صنعت کے ماہرین، صحافیوں اور فنکاروں کی موجودگی نے ہم آہنگی کے ایک متحرک ماحول کو فروغ دیا۔ نیٹ سول ٹیکنالوجیز کے چیئرمین اور سی ای او اور ایف سی کالج کے 1975 کے سابق طالب علم نجیب اللہ غوری اور ایم اے ایس گروپ آف کمپنیز کے ڈائریکٹر اور ایف سی کالج کے 1969 کے گریجویٹ شوکت حسن کوایوارڈ دیا گیا۔ دونوں ایوارڈ یافتہ افراد نے کمیونٹی کی خدمت اور انسان دوستی میں قابل ذکر خدمات انجام دی ہیں۔