شاہین دنیا کے بہترین کپتان‘ہر مشکل میں ٹیم کیلئے کھڑے ہوتے ہیں: ثمین رانا

لاہور(سپورٹس رپورٹر)لاہورقلندرز کے چیف آپریٹنگ آفیسر ثمین رانا نے کہا ہے کہ شاہین شاہ آفریدی پاکستان کے بہترین کپتان ہیں، حالیہ پی ایس ایل میں پرفارمنس پر شاہین کی پاکستان کیلئے کپتانی پر سوال اٹھانا غلط ہے۔لاہور قلندرز نے ہمیشہ مداحوں کا دل جیتا ہے، شاہین آفریدی پاکستان کے بہترین کپتان ہیں، حالیہ پی ایس ایل میں پرفارمنس پر شاہین کی پاکستان کیلئے کپتانی پر سوال اٹھانا غلط ہے۔  شاہین دنیا کے بہترین کپتان ہیں، میکلم، اظہر علی، حفیظ کے ہوتے ہوئے صرف شاہین آفریدی نے لاہور قلندرز کو ٹائٹل جتوایا، ہر مشکل صورتحال میں شاہین ٹیم کیلئے سامنے کھڑے ہوتے ہیں،شاہین اپنے سٹیٹس کی پرواہ نہیں کرتے، جس اینڈ سے چھوٹی باؤنڈری ہوتی، شاہین وہاں سے بائو لنگ کروانے آجاتے ہیں، ہر انسان کی عزت کرتے ہیں۔ لاہورقلندرز کی سب سے بہترین بات ایک دوسرے کو سپورٹ کرنا ہے،لاہور قلندرز کی اس سال پرفارمنس کی وجہ سے شاہین آفریدی سے پاکستان کی کپتانی لینے کی بات کرنا غلط ہے، راشد خان، شائی ہوپ، ڈین لارینس، راجا پکسا کی اس سال لاہورقلندرز کیلئے عدم دستیابی ہوئی، لاہور قلندرز نے ہمیشہ سے شائقینِ کرکٹ کے دل جیتے ہیں،لاہور قلندرز آخری بال اور آخری میچ تک لڑیگی۔ غیر ملکی کھلاڑیوں کے چناؤ کے وقت آپشنز بہت تھوڑی تھیں، لیگ کی پلاننگ میں بہت تاخیر ہوئی، جنوری میں تاریخوں کا اعلان کیا گیا، معلوم نہیں آئندہ سال پی ایس ایل کب ہوگی کیونکہ چیمپئنز ٹرافی ہے، اس بار پی ایس ایل کے حوالے سے بہت غیر یقینی صورتحال تھی جس سے لیگ پھر بڑی نہیں ہو سکی۔ لاہور قلندرز نے فین انگیج منٹ میں اتنا کام کیاکہ لوگوں نے کہا یہ تو آپ کاکام نہیں، لاہور قلندرز کے ہر میچ میں سٹیڈیم بھرتے ہیں، افسوس ہوا کہ کراچی میں کراؤڈ نہیں آرہا، سٹیڈیم کے حالات ایسے ہیں کہ انٹرنیشنل کھلاڑیوں کو لے جانے میں شرم محسوس ہوتی ہے، ہم لوکل سٹینڈرڈ سے بھی نیچے چلے گئے ہیں، اگر شائقینِ کرکٹ کا خیال نہ رکھا تو روٹھ جائیں گے۔