پاکستانی سامان کی کھیپ پہلی بار 48 گھنٹوں میں تاشقندپہنچ گئی  

اسلام آباد (نمائندہ خصوصی) پاکستان سے سامان کی پہلی بار کھیپ ٹی آئی آر کے تحت طورخم کے راستے تاشقند ، ازبکستان 48 گھنٹوں میں  پہنچ گئی ، مشیر تجارت نے کہا کہ افغانستان ، ازبکستان اور وسطی ایشیائی جمہوریہ کیساتھ تجارتی اور اقتصادی تعلقات کیلئے حکومت کا طویل المدتی ویڑن یہ ہے کہ ہم پاکستان کو تجارت ، ٹرانزٹ اور نقل و حمل کا مرکز بنانا چاہتے ہیں۔مشیر نے کہا کہ تجارتی شراکت داروں کے ساتھ رابطے قابل عمل تجارتی تعلقات کے لئے بہت ضروری ہیں۔ رابطہ نیٹ ورکس کی ساخت اور کارکردگی مارکیٹوں تک رسائی کو قابل بناتی ہے اور اسے تجارتی مسابقت کا پہلو سمجھا جانا چاہئے اس سے یہ یقینی بنائے گا کہ پاکستان اپنی بین الاقوامی تجارت کو بڑھانے کے لئے خطے میں اپنے جیو اقتصادی موقع کا فائدہ اٹھائے گا۔  انہوں نے کہا کہ افغانستان اور ازبکستان کے ساتھ حالیہ مصروفیات اس وڑن کے نفاذ کی سمت ایک قدم ہیں۔پاکستان کی ٹرانزٹ ٹریڈ کی تاریخ میں یہ سنگ میل حاصل کیا گیا ہے ۔