معروف بھارتی ولن، ورسٹائل اداکار سدا شیو امرپورکر انتقال کرگئے

ممبئی (نیٹ نیوز) بھارتی فلموں کے معروف ولن اور ورسٹائل ایکٹر سدا شیو امرپورکر ممبئی میں گزشتہ روز انتقال کرگئے۔ بی بی سی کے مطابق 64 سالہ امرپورکر گزشتہ 8 روز سے ممبئی کے امبانی ہسپتال میں داخل اور ڈاکٹروں کے مطابق پھیپھڑوں کے انفیکشن سے دوچار تھے۔ واضح رہے کہ سداشیو امرپورکر نے تقریباً 250 فلموں میں کام کیا جن میں اردھ ستیہ، آخری راستہ، سڑک، حکومت، آنکھیں اور عشق بے حد مقبول ہوئیں۔ 1984ء میں آنے والی فلم ادھ ستیہ یعنی نصف سچ کے لئے انہیں سپورٹنگ ایکٹر کے زمرے میں فلم فیئر ایوارڈ اور 1991ء میں آنے والی فلم سڑک کے لئے انہیں بہترین ولن کے انعام کا حقدار قرار دیا گیا تھا جس میں انہوں نے تیسری جنس بننے کا شوق رکھنے والے غنڈے کا کردار نبھایا تھا۔ گزشتہ برس آنے والی فلم ’’بمبئی ٹاکیز‘‘ ان کی آخری فلم ثابت ہوئی۔