ٹریفک حادثات: قصور باپ بیٹی‘ سرگودھا 7‘ اوکاڑہ میں 2 افراد جاں بحق 

قصور/  سرگودھا/ اوکاڑہ (نمائندہ نوائے وقت، نامہ نگاران) قصور‘ سرگودھا اور اوکاڑہ میں مختلف حادثات میں گیارہ افراد جاں بحق دس زخمی‘ جاں بحق ہونیوالوں میں باپ بیٹی اور ماں بیٹے بھی شامل۔ تفصیلات کے مطابق قصور میں ٹریفک حادثہ میں باپ بیٹی جاں بحق۔ ہرچوکی کا رفیق بارہ ساہ بیٹی ثانیہ کے ساتھ موٹرسائیکل پر گھر سے بائی پاس جانے کے لئے نکلا جیسے ہی وہ ہرچوکی موڑ کے قریب پہنچا تو سامنے سے آنیوالے تیز رفتار ٹریکٹر ٹرالہ سے ٹکرا گیا جس سے دونوں باپ بیٹی کچلے گئے اور زخموں کے تاب نہ لاتے ہوئے موقع پر ہی دم توڑ  گئے۔ جبکہ ٹریکٹر ڈرائیور ٹریکٹر موقع پر ہی چھوڑ کر سے فرار ہو گیا۔ سرگودھا میں  مختلف ٹریفک حادثات میں7 افراد جاں بحق، 7 شدید زخمی۔ بھیرہ میں موٹر سائیکل سواروں کو بچاتے ہوئے کار درخت سے جا ٹکرائی جس کے نتیجے میں ماں بیٹا موقع پر جاں بحق، باپ بیٹا اور موٹر سائیکل سوار شدید زخمی ہوگئے۔ نواحی موضع اچراں کا محمد یار کار نمبر پی بی جی 833 پر واپس گھر آ رہا تھا کہ علی پور نون کے قریب موٹر سائیکل ایس جی این 2826 کے سواروں کو بچاتے ہوئے درخت سے جا ٹکرائی جس سے محمد یار کی بیوی سکینہ بی بی اور بیٹا محمد آصف موقع پر ہی جاں بحق محمد عاطف اور موٹر سائیکل سوار منصب اور اس کا بھائی ناصر شدید زخمی ہو گئے۔  قصبہ بھلوال میں تیز رفتار گاڑی کی ٹکر سے محمد شریف جاں بحق اور بچی ماہ نور بی بی زخمی ہو گئی۔ اسی طرح کار کی موٹرسائیکل کوٹکر کے نتیجہ میں 7 سالہ بچہ جاں بحق اس کا باپ اور بہن بھائی شدید زخمی ہوگئے۔ کٹھہ سگھرال میں کوڑاکرکٹ (کباڑ) اکٹھا کرنیوالے ملنگ کی بیوی زیان بی بی اپنے ایک سالہ بیٹے حیدر سمیت ٹرک کے نیچے آ کرجاں بحق ہوگئی۔ جوہرآباد سے گروٹ روڈ پر جلالپور سیداں کے قریب موٹر سائیکل سلپ ہونے سے پچاس سالہ خاتون صدیقہ  بی بی جاں بحق ہو گئی جبکہ جبی میں موٹر سائیکل سلپ ہونے سے40 سالہ احمد نواز اور اس کا 8سالہ بیٹا محسن نواز زخمی ہوگئے۔ سرگودھا میانوالی روڈ پر قصبہ قائدآباد کے قریب کار اور ویگن کے تصادم میں 50 سالہ حاجی احمد شدید زخمی ہو گیا۔ اوکاڑہ میں 2روڈ حادثات میں خاتون سمیت 2افراد جاں بحق ہوگئے۔ جبکہ 3شدید زخمی ہوگئے۔ اوکاڑہ بائی پاس پر ایک تیز رفتار وین اور موٹرسائیکل رکشہ میں تصادم ہوگیا۔ نتیجے میں کمہاراں والا کھوہ ملتان کی  معراج بی بی موقع پر ہی جاں بحق ہوگئی، جب کہ دو افراد شدید زخمی ہوگئے۔ دوسرے حادثے میں ٹرک اورگدھا گاڑی کی ٹکر سے موضع بتھنہ کا رہائشی 15سالہ غلام احمد ولد غلام نبی موقع پر جاں بحق ہوگیا۔ جبکہ ایک شخص شدید زخمی ہوگیا۔