ننکانہ : پاکستان سٹیزن پورٹل آن لائن شکایات کے سلسلہ میں اجلاس

ننکانہ صاحب(نامہ نگار)پاکستان سٹیزن پورٹل آن لائن شکایات کے سلسلہ میں ڈپٹی کمشنر آفس ننکانہ صاحب کے کمیٹی روم میں خصوصی اجلاس کا انعقاد کیا گیا جس کی صدارت ڈپٹی کمشنر ننکانہ صاحب احمر نائیک نے کی۔ اجلاس میںمحکمہ ریونیو،تعلیم،میونسپل کمیٹیز،ہائی وے،بلڈنگز سمیت محکمہ سول ڈیفنس،سوئی گیس، اکائونٹس آفس،انڈسٹریز،پبلک ہیلتھ و دیگر محکموں نے شرکت کی۔ ڈپٹی کمشنر ننکانہ نے اس موقع پر ضلعی محکموں کے افسروں سے انکے محکمے سے متعلقہ سٹیزن پورٹل پر موصول ہونیوالی شکایات کے حوالے سے پوچھ گچھ کی۔ ڈپٹی کمشنر ننکانہ احمر نائیک نے کہا کہ پاکستان سٹیزن پورٹل پر موصول ہونے والی درخواستوں کو فوری حل کیا جائے کسی بھی قسم کی کوئی کوتاہی ناقابل برداشت ہوگی،تمام افسر عوام کے مسائل کوترجیحی بنیادوں پر حل کرنے میں کردار ادا کریں۔