مغربی نیپال کے علاقے جاجرکوٹ میں 5.7 شدت کے زلزلے کے نتیجے میں 128 افراد لقمہ اجل بن گئے، جبکہ سینکڑوں زخمی ہو گئے، شدید زلزلے کے باعث متعدد عمارتیں زمین بوس ہوگئیں۔
بین الاقوامی خبر رساں ادارے کی رپورٹ کے مطابق زلزلہ پیما مرکز کا اس حوالے سے کہنا ہے کہ نیپال میں 5.7 شدت کے زلزلے کا مرکز کھٹمنڈو سے 250 میل شمال مشرق میں واقع تھا، جس کی گہرائی 11 میل ریکارڈ کی گئی۔
رپورٹ کے مطابق امریکی زلزلہ پیما مرکز کا کہنا ہے کہ زلزلے کی شدت 5.6 ریکارڈ کی گئی ہے، نیپالی زلزلہ پیما مرکز نے زلزلے کی شدت 6.4 بتائی تاہم جرمن ریسرچ سینٹر فار جیو سائنسز نے شدت 5.7 بتائی۔
بھارتی میڈیا کا کہنا ہے کہ نیپال میں آنے والے زلزلے کے جھٹکے بھارت میں دہلی سمیت دیگر علاقوں میں بھی محسوس کیے گئے۔
بھارتی میڈیا کے مطابق زلزلے سے متاثرہ علاقوں میں امدادی سرگرمیاں شروع کر دی گئی ہیں، کئی عمارتوں اور انفرااسٹرکچر کو بھی شدید نقصان پہنچا ہے، ملبے میں پھنسے لوگوں کو نکالنے کیلئے کارروائیاں تیز کردی گئی ہیں۔
حکام نے کئی لوگوں کے ملبے تلے پھنسے ہونے کے خدشے کا اظہار کرتے ہوئے ہلاکتوں میں اضافے کا بھی امکان ظاہر کیا ہے۔