طلبہ وطالبات ا ور اساتذہ کا بہاولپور گیریژن کا دورہ

بہاولپور(این این آئی)بہاولپور کے مختلف تعلیمی اداروں کے طلبہ و طالبات اور فیکلٹی نے بہاولپور گیریژن کا دورہ کیا۔ بہاولپور کے طلبہ و طالبات اور فیکلٹی نے بہاولپور گیریژن میں ایک دن پاک فوج کے ساتھ گزارا۔طلبا کو پاک فوج کی ملک و قوم کیلئے دی گئی لازوال قربانیوں اور کسی بھی خطرے سے نمٹنے کے بارے میں بریفنگ دی گئی۔طلبا کو فوجی طرز زندگی اور روزمرہ کے معمول کے بارے میں بھی آگاہی فراہم کی گئی۔طلبہ وطالبات نے فوجی سرگرمیوں کا عملی نمونہ بھی دیکھا جس سے وہ خوب محظوظ اور متاثر ہوئے۔ طلبا کے وفد کو اسالٹ کورس کا مظاہرہ بھی دکھایا گیا، انہوں نے ٹینک اور بکتر بند گاڑیوں پر سیر بھی کی۔طلبا کو ٹینک مینٹیننس اور موبائل ریمپ بنانے کی مشق بھی دکھائی گئی۔ ان آپریشنل ایکٹوٹیز سے طلبہ و طالبات بہت متاثر ہوئے اس دورے کا مقصد عوام اور فوج کے درمیان تعلقات کو مزید مستحکم بنانا ہے۔طلبا کے وفد نے بتایاکہ ہمیں یہاں پر بہت سی فوجی آپریشنل اور میٹنئس سرگرمیاں دکھائی گئی ہیں ہم نے عسکری ٹریننگ دیکھی اور پاک فوج کے وطن عزیز کیساتھ جذبے نے ہمیں بہت متاثر کیا۔طلبا نے کہاکہ ہم پاک فوج کی ٹریننگ اور تربیتی معیار کو خوب سراہتے ہیں، ہماری پاک فوج کسی بھی دشمن کی فوج سے کم نہیں ہے اور وقت آنے پر ہماری حفاظت کر سکتی ہے۔