گروسری اسٹور پر بیوی کا انتظار کرنے والے امریکی شخص پر قسمت کی دیوی مہرباں ہوگئی۔

غلطی سے  اپنا لنچ گھر بھولنے والے امریکی شخص کو اس کی بیوی نے فون کر کے گروسری اسٹور پر انتظار کرنے کا کہا  جہا اس پرقسمت کی دیوی مہرباں ہوگئی۔ میڈیا  رپورٹس کے مطابق امریکی شخص ملازمت پر جاتے ہوئے غلطی سے اپنا کھانا گھر بھول آیا جس پر اس کی اہلیہ نے اسے فون کر کے کسی قریبی گروسری اسٹور پر رکنے کا کہاکہ وہ وہاں اسکا لنچ باکس پہنچادے گی۔میڈیا رپورٹس کے مطابق میسوری لاٹری اسٹور کے حکام کا کہنا ہے کہ مذکورہ شخص ان کے اسٹور پر اپنی اہلیہ کا انتظار کر رہا تھا کہ اس کی نظر لاٹری ٹکٹ پر پڑی، چونکہ وہ ماضی میں کبھی 1 مرتبہ 60 ڈالرز کی لاٹری جیت چکا تھا تو اس نے ایک بار پھر اپنی قسمت آزمانی چاہی۔ لاٹری جیتنے والے شخص کا کہنا ہے کہ میں عام طور سے لاٹری ٹکٹ خریدنے میں دلچسپی نہیں رکھتا لیکن ماضی میں ایک بار 60 ڈالرز کا انعام جیت چکا تھا اور اس وقت میرے پاس 30 ڈالرز تھے تو میں نے اپنی قسمت ایک بار پھر آزمانے کا سوچا۔ اس کا کہنا ہے کہ میں نے کبھی سوچا بھی نہیں تھا کہ لاٹری ٹکٹ اسکریچرز گیم میں حصہ لینے پر 3 ملین ڈالرز کا پہلا انعام میں جیت جاؤں گا۔ مذکورہ شخص کا کہنا ہے کہ مجھے یقین نہیں آ رہا تھا، میں پوری طرح حیران تھا، مجھے نہیں لگتا تھا کہ میں جیت گیا ہوں، اس لیے میں نے سب نمبرز غور سے دیکھے اور جب یقین ہوا تو سب سے پہلے اپنی اہلیہ کو کال کر کے بتایا۔