ملتان( سپیشل رپورٹر)سربراہ پی ڈی ایم مولانا فضل الرحمان کا کہنا ہے کہ عمران خان کی سیاست میں کوئی اہمیت نہیں ، پی ٹی آئی سے کسی قسم کی گفتگو نہیں ہو سکتی ۔ سید یوسف رضا گیلانی نے کہا کہ عمران خان کو آرمی چیف کی تعیناتی پر ڈسکشن نہیں کرنی چاہیئے - سید یوسف رضا گیلانی کے ہمراہ مشترکہ پریس کانفرنس کرتے ہوئے مولانا فضل الرحمان نے کہا کہ پی ٹی آئی حکومت نے پوری دنیا میں پاکستان کو تنہا کر دیا ، اسلام آباد آنے والوں کے لئے رانا ثناء  اللہ تیار ہیں ، ان کی ایڑھیاں گالوں سے بھی نرم ہیں ، یہ گرم زمین پر پاؤں رکھنے کے متحمل نہیں ہو سکتے - آرمی چیف کے تقرر یا توسیع کو آئین کے تناظر میں دیکھنا ہو گا کیونکہ آئین میں آرمی چیف کی تعیناتی و توسیع کا طریقہ کار موجود ہے - پی ڈی ایم سربراہ نے کہا کہ ہم نے پورے ملک میں اس رجیم کے خلاف تحریک چلائی ، بڑی جدو جہد کے بعد قوم کو اس فتنے سے آزادی ملی ہے - اس موقع پر سید یوسف رضا گیلانی نے کہا کہ فارن فنڈنگ کیس میں ان کی غلط بیانی ثابت ہو گئی ہے ، اب انہیں چور چور کی رٹ ختم کر دینی چاہیئے - ہمیں امپورٹڈ کا طعنہ دینے والے خود امپورٹڈ ہیں - ہم نے ملک کو دیوالیہ ہونے سے بچایا ، پٹرول کی طرح بجلی بھی سستی کریں گے - سید یوسف رضا گیلانی نے آرمی چیف کی تقرری کے حوالے سے کہا کہ وزیر اعظم کی ایڈوائس پر آرمی چیف کی تعیناتی ہوتی ہے ، عمران خان کو اس معاملے کو ڈسکس نہیں کرنا چاہیئے - عمران خان حکومت کو ڈکٹیٹ کرنے والا کون ہوتا ہے ؟ ہم نے ملک بچانے کے لئے پارٹیوں کی مقبولیت پر ملک کو ترجیح دی ، انہوں نے سائبر کو لیٹر بنا کر اس سے کھیلنے کی باتیں کی ، جس کا عالمی سطح پر ملک کو نقصان ہوا - مولانا فضل الرحمان نے ٹرانس جینڈر بل میں ترمیم کے حوالے سے کہا کہ اس بل میں سقم موجود تھے ، اس لئے اس بل کی اصلاح کی طرف جا رہے ہیں -