آرمی چیف جنرل قمرجاوید باجوہ سے وزیراعظم آزادکشمیر عبدالقیوم نیازی کی ملاقات

آرمی چیف جنرل قمرجاوید باجوہ سے وزیراعظم آزادکشمیر عبدالقیوم نیازی نے ملاقات کی،ملاقات میں مقبوضہ کشمیر کے حالات اور ایل او سی کی صورتحال پر تبادلہ خیال کیاگیا۔پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ سے وزیراعظم آزاد جموں و کشمیر عبدالقیوم نیازی نے جنرل ہیڈ کوارٹر( جی ایچ کیو )راولپنڈی میں ملاقات کی جس میں بھارت کے غیر قانونی زیر قبضہ جموں و کشمیر حالات، یکطرفہ بھارتی اقدامات اور لائن آف کنٹرول کی صورتحال پر بات چیت کی گئی  ۔آئی ایس پی آر کے مطابق آرمی چیف جنرل قمر جاوید باجوہ نے سینئر حریت رہنما سید علی گیلانی کو خراج عقیدت پیش کرتے ہوئے کہا  کہ سید علی گیلانی نے ساری زندگی کشمیریوں کے حق خودارادیت کے حصول کیلئے بے لوث جدوجہد جاری رکھی۔ آرمی چیف جنرل قمر جاوید باجوہ نے وزیراعظم آزاد جموں و کشمیر عبدالقیوم نیازی کو یقین دہانی کرائی کہ پاک فوج کشمیر کاز کے ساتھ پرعزم کھڑی ہے ، پاک فوج کشمیری عوام کی بھرپور حمایت جاری رکھے گی۔آرمی چیف جنرل قمر جاوید باجوہ  نے وزیراعظم آزاد جموں و کشمیر کو نئی ذمہ داری سنبھالنے پر مبارکباد بھی دی اور خطہ کشمیر کے استحکام کیلئے نیک خواہشات کا اظہار کیا۔ اس موقع پروزیراعظم آزاد کشمیر عبدالقیوم نیازی نے آزاد جموں و کشمیر میں سکیورٹی و ترقی کیلئے پاک فوج کے کردار کی تعریف کی۔