راولپنڈی اور لاہور میں آج سے سات روزہ انسداد پولیو مہم شروع کی جائے گی

راولپنڈی(سٹاف رپورٹر)پنجاب کے دو اضلاع راولپنڈی اور لاہور میں آج  پیرسے انسداد پولیو مہم  شروع کی جائے گی۔ مہم راولپنڈی اور لاہورمیں مثبت ماحولیاتی نمونوں کے تناظر میں شروع کی جا رہی ہے۔ مہم کو ایونٹ رسپانس کا نام دیا گیا ہے جس کے دوران 7 لاکھ 87 ہزار بچوں کو قطرے پلائے جائیں گے۔ انسداد پولیو مہم میں 7 ہزار 400 سے زیادہ ورکر حصہ لے رہے ہیں جس میں راولپنڈی میں 6 ہزار سے زائد اور لاہور میں 1386 ورکر مہم میں حصہ لے رہے ہیں۔ مہم لاہور کی 29 یونین کونسلوں میں منعقد کی جائیگی۔ جبکہ راولپنڈی میں مہم 4 تحصیلوں میں منعقد کی جائے گی۔ اس موقع پر بات کرتے ہوئے پنجاب انسداد پولیو پروگرام سربراہ کا کہنا تھا کہ مہم کا مقصد وائرس کے پھیلاو کو روکنا ہے۔ خضر افضال کا کہنا تھا کہ مہم سات روز تک جاری رہے گی۔ حکومت پولیو کے خاتمے کے لئے پر عزم ہے۔ انھوں نے خبردار کرتے ہوئے کہا کہ پنجاب کو بیرونی وائرس سے خطرہ درپیش ہے۔ لیکن والدین کی مدد سے وائرس کا خاتمہ کیا جائے گا۔