اینٹی نارکوٹکس فورس (اے این ایف )کے عملے نے دبئی سے کراچی پہنچنے والے ایک کنٹینر سے بھاری مقدار میں غیر ملکی شراب برآمد کر لی۔ترجمان اے این ایف کے مطابق غیر ملکی شراب کی 8520 بوتلیں کراچی کی نجی کمپنی کے لئے بک کرائی گئی تھیں۔ترجمان کے مطابق اس سلسلے میں تحقیقات شروع کر دی گئیں۔اے این ایف نے ملک کے دیگر علاقوں میں مختلف کارروائیوں کے دوران بھاری مقدار میں منشیات برآمد کر کے 5 ملزمان کو گرفتار کیا ہے۔موٹر وے ٹول پلازہ اسلام آباد کے قریب مسافر بس میں سوار 2 ملزمان سے مجموعی طور پر 2 کلو چرس اور 480 گرام آئس برآمد ہوئی۔ ٹوبہ ٹیک سنگھ میں موٹر سائیکل سوار سے 6 پیکٹ چرس برآمد ہوئی۔یونیورسٹی روڈ پشاور سے ملزم سے 464 نشہ آور گولیاں برآمد کی گئیں، ہنگو کے رہائشی ملزم نے منشیات یونیورسٹی کے طلبا کو فروخت کرنے کا اعتراف کیا ہے۔باچا خان انٹرنیشنل ایئر پورٹ پر مسافر کے پیٹ سے ہیروئن سے بھرے 86 کیپسول برآمد کئے گئے، خیبر کا رہائشی ملزم پرواز نمبر EK-637 کے ذریعے دبئی کے لئے روانہ ہو رہا تھا۔ترجمان اے این ایف کے مطابق خیبر کے علاقے زخہ خیل میں 2 کارروائیوں میں سمگلنگ کے لئے چھپائی گئی 20 کلو چرس برآمد کی گئی۔تمام ملزمان کے خلاف انسدادِ منشیات ایکٹ کے تحت مقدمات درج کر کے مزید تحقیقات کا آغاز کر دیا گیا۔