گوادر میں پاک بحریہ کا ہیلی کاپٹر تربیتی پرواز کے دوران ممکنہ فنی خرابی کے باعث گر کر تباہ ہوگیا ہے جس کے نتیجے میں 2 آفیسرز سمیت 3 جوانوں نے جامِ شہادت نوش کر لیا۔
تفصیلات کے مطابق پاک بحریہ کا ہیلی کاپٹر گوادر میں ممکنہ فنی خرابی کے باعث گرنے کے نتیجے میں 2آفیسرز اور 1 جوان شہید ہوگئے۔ حکام کا کہنا ہے کہ جس وقت حادثہ ہوا، ہیلی کاپٹر معمول کی تربیتی پرواز پر تھا۔ترجمان پاک بحریہ کا کہنا ہے کہ افسوسناک حادثے کے نتیجے میں پاک بحریہ کے 2 افسران اور ایک جوان شہید ہوئے۔ ہیلی کاپٹر اپنی تربیتی پرواز کے دوران ممکنہ فنی خرابی کے باعث حادثے کا شکار ہوا۔ واقعے کی تحقیقات شروع کردی گئی ہیں۔
خیال رہے کہ اس سے قبل پاک فضائیہ کا طیارہ بھی تربیتی پرواز کے دوران گر کر تباہ ہوگیا .جس کی وجوہات پر تفتیش کا آغاز کیا گیا۔گزشتہ برس مئی کے دوران پاک فضائیہ کا طیارہ میانوالی کے قریب تربیتی مشن کے دوران گر کر تباہ ہوا جبکہ حادثے کے دوران کوئی جانی نقصان نہیں ہوا۔فضائیہ کے تربیت یافتہ پائلٹ نے حادثے کا شکار ہونے والے طیارے سے چھلانگ لگا دی اور پیراشوٹ کے ذریعے بحفاظت زمین پر اترنے میں کامیاب ہوگیا۔
