ایتھوپیا کا ثقافتی طائفہ آئی سی سی آئی ہال میں اپنے فن کا مظاہرہ کریگا، احسن ظفر بختاوری 

اسلام آباد (نمائندہ  خصوصی) پاکستان اور ایتھوپیا کے درمیان تجارت، ثقافت اور تعلیم جیسے مختلف شعبوں میں مضبوط تعلقات کے ساتھ تعاون اور دوستی کی ایک طویل تاریخ ہے۔ پاکستان اور ایتھوپیا کے درمیان بے شمار مماثلتیں ہیں جن میں ان کی خودمختاری، علاقائی سالمیت اور اقتصادی ترقی کے عزم شامل ہیں۔ دونوں ممالک ایک بھرپور ثقافتی ورثہ اور علاقائی امن و استحکام کی شدید خواہش میں بھی شریک ہیں۔ یہ بات ڈاکٹر جمال بیکر عبد اللہ سفیر ایتھوپیا نے اسلام آباد چیمبر آف کامرس اینڈ انڈسٹری کے صدر احسن ظفر بختاوری سے چیمبر ہاؤس کے دورے کے موقع پر گفتگو کرتے ہوئے کہی۔سفیر نے پاکستان اور ایتھوپیا کے ساتھ ساتھ افریقی ممالک کے ساتھ وسیع تر تعلقات کو فروغ دینے میں احسن ظفر بختاوری کی کوششوں کی تعریف کی۔ انہوں نے اسٹریٹجک شراکت داری کو مزید مضبوط بنانے اور دونوں ممالک کے عوام کو ایک دوسرے کے قریب لانے کے لیے مسلسل تعاون کی اہمیت پر زور دیا۔ انہوں نے زور دیا کہ باہمی افہام و تفہیم کو گہرا کرنے، اقتصادی تعاون کو فروغ دینے اور مجموعی دو طرفہ تعلقات کو بڑھانے کے لیے اجتماعی کوششیں ضروری ہیں۔سفیر بیکر نے اعلان کیا کہ سفارت خانہ ایتھوپیا کے قومی دن کے موقع پر 11 ستمبر کو چیمبر ہاؤس میں ایک ثقافتی تقریب کی میزبانی کرنے کا ارادہ رکھتا ہے۔ اس تقریب کا مقصد ایتھوپیا کے بھرپور ثقافتی ورثے کی نمائش کرنا ہے، جس میں ایک ثقافتی طائفہ پرفارم کرے گاجو پاکستان اور ایتھوپیا کے عوام کے درمیان زیادہ افہام و تفہیم اور قربت کے فروغ کا باعث بنے گا۔، 12 ستمبر کو، سفارت خانہ اسلام آباد میں ایک میراتھن کا انعقاد کرے گا، جس میں ایتھوپیا کے رنرز، سفارت کار، معززین، طلباء￿  اور دیگر شرکت کریں گے۔