رہنما مسلم لیگ (ن) حمزہ شہباز کا کہنا ہے کہ عمران نیازی کو چور اور ڈاکو ڈھونڈنے ہیں تو اپنی کابینہ میں تلاش کریں۔
لاہور میں میڈیا سے گفتگو میں حمزہ شہباز شریف کا کہنا تھا کہ آج نیب نے چادر اور چار دیواری کا تقدس پامال کیا، کیا ہم دہشت گرد ہیں، حمزہ شہباز ایک پاکستانی ہے، جب بھی بلایا گیا میں نیب میں پیش ہوا اور جو گفتگو دوران تفتیش کی جاتی ہے میں نہیں بتانا چاہتا۔
حمزہ شہباز کا کہنا تھا کہ میری بیٹی جب زندگی اور موت کی کشمکش میں تھی عمران خان نے اس پر بھی سیاست کی، عدالت نے جتنے دن باہر جانے کی اجازت دی اس سے ایک دن پہلے پاکستان میں تھا۔ انہوں نے کہا کہ آج کیا قیامت ٹوٹ گئی جو گھر پر دھاوا بولا گیا، آج عدالت کے فیصلے کی دھجیاں اڑائی گئیں اور نیب نے شرمناک حرکت کی ہے۔
حمزہ شہباز کے وارنٹ کے باوجود گرفتاری کے بغیر نیب ٹیم کے واپس جانے کے بعد پریس کانفرنس کرتے ہوئے حمزہ شہباز نے کہا کہ جب بھی نیب نے طلب کیا پیش ہوا، میرے والد شہباز شریف کو صاف پانی کیس میں بلا کر آشیانہ میں گرفتار کر لیا گیا۔
اپوزیشن لیڈر پنجاب اسمبلی کا کہنا تھا کہ سپریم کورٹ کے جج نے کہا کہ نیب سیاست زدہ ہوچکی ہے، نیب کی کارروائیوں سے بریگیڈیئر اسد منیر نے خودکشی کی، نیب ہتھکڑیاں لگا کر لوگوں کی عزت سے کھیلتی ہے۔
حمزہ شہباز نے کہا کہ آج کے واقعے کے بعد بھی اخلاق کے دائرے میں رہوں گا، میں اخلاقیات کے دائرے سے نیچے نہیں آؤں گا، 10 سال تک نیب کے دفتر کے باہر6،6 گھنٹے بیٹھتا تھا تاہم نیازی صاحب آپ ایک دن جیل نہیں کاٹ سکتے، ہمیں نہ ڈراؤ ہم صرف اللہ سے ڈرنے والے ہیں۔
رہنما مسلم لیگ (ن) نے کہا کہ نیازی صاحب سیاست کریں، ایڈونچر نہ کریں، عمران نیازی کو چور اور ڈاکو ڈھونڈنے ہیں تو اپنی کابینہ میں تلاش کریں، آج عمران خان کا حسد اور بغض سے بھرا ہوا چہرا ایک بار پھر سب کے سامنے آگیا ہے۔
نجاب اسمبلی میں قائد حزب اختلاف حمزہ شہباز کا مزید کہنا تھا کہ میرے پاس عدالتی فیصلہ موجود ہے جس میں لکھا ہے کہ گرفتاری سے10روز قبل آگاہ کیا جائے گا۔ اس کے باوجود آج نیب کی جانب سے گھر پر دھاوا بول کر عدالتی فیصلے کی توہین کی گئی، نیب نے چادر چاردیواری کا تقدس پامال کرتے ہوئے گرفتاری کی کوشش کی۔ یہ شرمناک حرکت ہے، ایسا محسوس ہوا جیسے ہم دہشتگرد ہیں۔
ان کا کہنا تھا کہ نیب ٹیم آج سپر مین بن کر مجھے گرفتار کرنے آئی، بہتر تھا طلب کر لیتے۔ حمزہ شہباز نے وزیراعظم عمران خان کو ہدف تنقید بناتے ہوئے کہا کہ عمران خان سپورٹس مین نہیں یہ کھلنڈرا شخص ہے۔ مجھے عدالت نے بیرون ملک بیٹی کی عیادت کیلئے بیرون ملک جانے کی جازت دی، میری بیٹی موت کی جنگ لڑ رہی تھی اس پر بھی نیازی صاحب نے سیاست کی۔ ان کی حکومت نہیں گرائیں گے نہ انھیں سیاسی شہید بننے دیں گے۔
