اسلام آباد ( کلچرل رپورٹر)سیونتھ سکائی انٹرٹینمنٹ کا نیا میگا پروجیکٹ "راز ِالفت"جلد منظر عام پر آئے گا۔ مقبول ترین جوڑی عبداللہ کادوانی اور اسدقریشی کی سربراہی میں بننے والے اس میگا پروجیکٹ کی کہانی ایک معصوم اور بھولی بھالی نوجوان لڑکی مشک کے گرد گھومتی دکھائی دے گی، جس کا تعلق ایک قدامت پسند گھرانے سے ہے، اورجب تک اس کی ملاقات صاحبہ نامی لڑکی سے نہیں ہوئی تھی وہ اپنے سخت گیر والد کے بنائے اصولوں کے تحت اپنی زندگی گزار نے پر مجبور ہوتی ہے، صاحبہ ایک ماڈرن اور گھر سے باہر نکلنے والے لڑکی ہے، جو کہ عادات کے اعتبار سے مشک سے انتہائی مختلف ہے۔ ان دونوں کے درمیان دوستی پر حسد کے بادل منڈلانے لگتے ہیں، اور صاحبہ حسد کی آگ میں جل کر نہ صرف مشک سے اس کی نئی نئی محبت جو کہ وہ ارتضیٰ سے کرتی ہے تعلقات خراب کردیتی ہے بلکہ مشک کے تعلقات اس کے اپنے گھروالوں سے بھی خراب کردیتی ہے۔ ڈرامے کی کاسٹ میں یمنہ زیدی، شہزاد شیخ، کومل عزیز، گوہر رشیدشامل ہیں جبکہ دیگر کاسٹ میں حنا بیات، سیمی پاشا، منظور قریشی، فرحان علی آغا، تارہ محمود، کرن حق اور انعم تنویر شامل ہیں، ڈرامے کی کہانی ماہا ملک نے تحریر کی ہے جبکہ ہدایات معروف ہدایت کار سراج الحق نے دی ہیں ۔یہ امر قابل ذکر ہے کہ سیونتھ سکائی انٹرٹینمنٹ کمپنی تواتر سے پاکستانی ناظرین کو سپر ہٹ اور معیاری مواد فراہم کررہی ہے