میک ڈونلڈز کابائیکاٹ کے مطالبات کے درمیان اسرائیل میں فرنچائزڈ اسٹورزکے حصول کااعلان

میک ڈونلڈز کارپوریشن نے جمعرات کو کہا کہ وہ الونیال کو حاصل کرے گی جو اسرائیل میں میکڈونلڈ کے 225 ریستورانوں کا مالک ہے جو غزہ میں حماس کے ساتھ جنگ کے بعد بائیکاٹ کے مطالبات سے متاثر ہوئے ہیں۔لین دین کی شرائط ظاہر نہیں کی گئیں۔ میک ڈونلڈز نے ایک بیان میں کہا کہ یہ معاہدہ شرائط سے مشروط ہے جن کی اس نے شناخت نہیں کی۔الونیال نے 30 سال سے زیادہ عرصے سے اسرائیل میں میکڈونلڈ کے ریستوراں چلائے ہیں اور آج 5,000 سے زائد ملازمین کے ساتھ 225 فرنچائزڈ کاروباروں کے مالک ہیں۔ ان ملازمین کو فروخت کے بعد برقرار رکھا جائے گا۔فروری میں اپنی 2023 کی آمدنی کی رپورٹ پیش کرتے ہوئے میک ڈونلڈز نے کہا کہ اکتوبر میں اسرائیل پر حماس کے حملے سے شروع ہونے والی جنگ کے نتائج نے کاروبار کو متأثر کیا ہے۔میک ڈونلڈز کو بائیکاٹ کے مطالبات کا نشانہ بنایا گیا جب اسرائیل میں فرنچائزڈ ریستوراں نے ہزاروں اسرائیلی فوجیوں کو مفت کھانے کی پیشکش کی۔چیف ایگزیکٹیو کرس کیمپزنسکی نے ایک تجزیہ کار کال میں کہا، "ہم تسلیم کرتے ہیں کہ خطے میں ان کی برادریوں میں خاندانوں پر المناک طور پر جنگ کا اثر ہوا ہے اور ہماری ہمدردیاں اس وقت ان کے ساتھ ہیں۔"انہوں نے وضاحت کیے بغیر کہا کہ بائیکاٹ کا اثر "بامعنی" تھا۔میکڈونلڈ کی چوتھی سہ ماہی کی فروخت نے تجزیہ کاروں کو مایوس کیا۔ ریاست ہائے متحدہ سے باہر فرنچائزڈ ریستوراں میں فروخت گذشتہ سہ ماہی کی نسبت 0.7 فیصد گر گئی۔کیمپزنسکی نے کہا، "ظاہر ہے کہ جس جگہ ہم واضح ترین اثر دیکھ رہے ہیں وہ شرقِ اوسط میں ہے۔ ہم دیگر مسلم ممالک جیسے ملائیشیا، انڈونیشیا میں کچھ اثر دیکھ رہے ہیں۔انہوں نے کہا، فرانس جیسے بڑی مسلم آبادی والے ممالک میں بھی ایسا ہوا، بالخصوص مسلم اکثریتی محلوں میں۔جمعرات کو مارکیٹ کے اوقات کے بعد کی تجارت میں میکڈونلڈ کے حصص تقریباً 2 فیصد کم تھے۔