ملتان : سپرے کرنے پر مالک مکان نے ڈینگی ٹیم پر کتے چھوڑ دئیے، 2 زخمی

ملتان ( آن لائن +سٹاف رپورٹر) ملتان کے علاقے پرانا بہاولپور روڈ پر واقع ایک گھر کے مالک نے ڈینگی ٹیم پر کتے چھوڑ دئیے جس سے خاتون اہلکار سمیت 2افراد زخمی ہو گئے جنہیں ہسپتال منتقل کر دیا گیا۔ ڈی سی او ملتان نے واقعہ کا نوٹس لیتے ہوئے ملزم کی گرفتاری کا حکم دیدیا ۔ تفصیلات کے مطابق ملتان میں پرانا بہاولپور روڈ پر ڈینگی سپرے کرنے والی ٹیم ڈینگی کے خاتمے کیلئے مصروف تھی کہ اس دوران ایک شخص گھر سے نکلا اور ڈینگی سپرے کرنے سے روک دیا اور تکرار شروع کردی تاہم ڈینگی ٹیم کی جانب سے سپرے نہ روکنے پر گھر کے مالک نے کتے چھوڑ دیئے جن کے کاٹنے سے ڈینگی ٹیم ک کی خاتون اہلکار سمیت 2 اہلکار زخمی ہوگئے جنہیں فوری طور پر قریبی ہسپتال منتقل کر دیا گیا۔ڈی سی او ملتان نے واقعہ کا فوری نوٹس لیتے ہوئے پولیس کو تحقیقات کا حکم دیدیا اور ہدایت کی کہ ملزم کو فوری گرفتار کر کے مقدمہ درج کیا جائے۔ملزم کے گھر چھاپہ مارنے پر ڈینگی کا لاروا بھی برآمد ہوا ۔