کراچی (اسپورٹس ڈیسک)ٹوکیو اولمپکس کے گیارہویں روز بھی چینی ایتھلیٹ 3گولڈ میڈلز   جیت کر  تمغوں کی مجموعی دوڑ میں سب سے آگے رہے۔چینی ایتھلیٹس نے مزید3گولڈ میڈلز جیت کر  طلائی تمغوں کی  تعداد 32کرلی۔چین نے آرٹسٹک جمناسٹک کے مینز اور ویمنز ایونٹ میں طلائی تمغے جیتے جبکہ ڈائیونگ کے 3 میٹر مینز اسپرنگ بورڈ میں بھی سونیکا تمغہ اپنے سینے پر سجایا۔امریکی ایتھلیٹس نے خواتین کی 800میٹر دوڑ میں سونے کا تمغہ جیتا جبکہ خواتین کی فری اسٹائل ریسلنگ میں سونے کا تمغہ حاصل کیا، امریکا 24 طلائی تمغوں کے ساتھ دوسرے نمبر پر ہے۔ میزبان جاپان کی ٹیم نے 11ویں روز2 طلائی تمغے جیت کر تیسری پوزیشن پر قبضہ برقرار رکھا۔اس کے علاوہ برطانیہ نے 3 ،جرمنی ،نیوزی لینڈ اور برازیل نے2،2 طلائی تمغے جیتے ، جبکہ ناروے ،سوئیڈن ،پولینڈ  ،کیوبا ،ہنگری ،نیدر لینڈز ،اٹلی،ازبکستان بھی ایک ایک سونے کا تمغہ جیتنے میں کامیاب رہے۔