پاکستان لگن اور توجہ سے بڑی کامیابیاں حاصل کرسکتا ہے : آرمی چیف 

اسلام آباد (خبرنگار خصوصی) آرمی چیف جنرل عاصم منیر نے پاکستان کو 37 سال بعد ورلڈ جونیئر سکواش چیمپئن بنانے والے حمزہ خان کو تعلیم اور کھیلوں میں مکمل تعاون کی یقین دہانی کروا دی۔ آئی ایس پی آر کے مطابق آرمی چیف جنرل عاصم منیر سے ورلڈ جونیئر سکواش چیمپئن حمزہ خان نے جی ایچ کیو میں ملاقات کی۔ آرمی چیف نے نوجوان چیمپیئن کو ملک کیلئے بڑا اعزاز حاصل کرنے پر مبارکباد دی۔ آرمی چیف نے اس موقع پر کہا کہ آپ جیسے باصلاحیت نوجوان پر قوم کو فخر ہے اور آپ کی کامیابی سے قوم کا سر فخر سے بلند ہوا ہے۔ جنرل عام منیر نے کہا کہ پاک فوج ملک میں نوجوان ٹیلنٹ کو آگے لانے میں مدد کرتی رہے گی اور انہیں حصول تعلیم اور کھیلوں میں مکمل تعاون فراہم کرے گی۔ انہوں نے زور دیا کہ نوجوان اس ملک کا مستقبل ہیں جن کی توجہ، لگن اور محنت سے پاکستان بڑی کامیابیاں حاصل کر سکتا ہے۔
آرمی چیف