عراقی سکیورٹی حکام نے داعش کے مقتول سربراہ ابوبکر البغدادی کے ڈپٹی چیف کی گرفتاری کا اعلان کیا ہے۔العربیہ ٹی وی کے مطابق عراقی پولیس نے شمالی صوبہ کرکوک میں ایک کارروائی میں ابو خلدون نامی اس جنگجو کوگرفتار کیا ہے۔عراقی سکیورٹی میڈیا سیل نے اپنے ٹویٹراکاونٹ پر اس گرفتار شخص کی تصاویر جاری کی ہیں اور کہا ہے کہ یہ انتہا پسند لیڈر جعلی شناختی کارڈ کے ساتھ پکڑا گیا ہے۔ بیان میں بتایا ہے کہ صوبہ کرکوک میں حویجہ پولیس کے ایک یونٹ نے ابو خلدون نامی دہشت گرد کو یکم مارچ کے علاقے میں واقع ایک اپارٹمنٹ سے پکڑا ہے۔اس کے پاس شعلان عبید کے نام سے ایک جعلی شناختی کارڈ برآمد ہوا ہے۔واضح رہے کہ داعش کے سربراہ ابوبکرالبغدادی شام کے شمال مغربی صوبہ ادلب میں اکتوبر میں امریکی کمانڈوز کی کارروائی میں مارے گئے تھے۔